Lalduhoma’n Prime Minister a vaukhan

Inrinni khan Brigade Parade Ground, Kolkata-ah Trinamool Congress huaihawtin Mega Rally neih a ni a, he Rally-ah hian ZPM Leader, Lalduhoma, MLA leh Andrew H.Thangliana, MLA te an tel.

He Rally ah hian thu sawiin Lalduhoma chuan, “Tunhnai Lok Sabha-a Citizenship Amendment Bill pass a nih avangin North East pum pui chu ram kang ang maiin a kang duai duai a, he bill avang hian North East mite chuan ram neitu nihna kan hloh chho mek a. India Prime Minister vaukhan leh hrilh duh ka nei a, he Bill hi Dan-a siam a nih vaih chuan India ram hi keini tan chuan awm rengna tlakah kan ngai dawn lo a ni. He Bill hi hnuhkir emaw North East tana awltir emaw kan duh a ni,” a ti.

Lalduhoma chuan tunah hian Hnam tenau, Sakhaw vuantu tlem leh ram zim zawk neitute chu BJP leh a chakna hnar pawl hrang hrangte hnuaiah an him lo em em tih sawiin, “India ram ropui tak history te chu an duh dan danin an ziak \hain an ziak danglam duh a, kan mimal nunah an inrawlh a, kan ei tur leh ei loh turte min hrilh bawk a, kan sakhaw biakna thilah inrawlhin min zahsak hek lo. India ramah hian kan hma lawkah secular (sakhaw tih bik nei lo) sawrkar kan neih ka beisei a. Chutih hunah chuan North East mipuite venhim kan ni tawh ang,” a ti bawk.

He Mega Rally hi BJP tan ‘Death Knell’ (mitthi dar ri) tia vuahin, United India Rally (India insuihkhawmna Rally) tiin an sawi bawk a. BJP chu a zung nena karphawn a nih tur thu te, Pakistan-in kum tam tak chhunga India \hendarh an tuma an theih loh chu kum 5 chhungin Modi-a leh Amit Shah ten an thei, lar khel Prime Minister aiin Prime Minister hnathawk kan duh tihte chu an thusawi lar zual \henkhat a ni.