Cancer inzirtir hna pawimawh bik a ni - Larsap

Mizoram Larsap, Kummanam Rajasekharan chuan Cancer natna \ihbaiawm tak chungchang leh a pumpelh dan inzirtirna chu hna pawi-mawh bik a ni, a ti.

Hmarchhak bial mipuite puala Cancer chungchanga leh a invendan inzirtirna, NEC-Pink Chain Campaign-2019 buatsaih meka programme pakhat, Mithiamte fuankawmna leh sawihona hun, Conclave Inrinni-a Aijal Club-a neih a hmanpuina ah he thu hi Larsap chuan sawiin, Cancer chungchang leh a pumpelh dan inzirtirna chu Mizoram tan ngat phei chuan state dang te aiin a pawimawh leh zual tih a sawi a. Cancer chungchang, a lo lanchhuahdan te, inenkawl dan te leh a inven dan te chu Mizo mipui ten kan hriatthiam zawngin a \awngkam tluangtlam zawk thlenga inzirtir uar zawk pawh kan mamawh tawh takzet a ni, a ti.

Larsap chuan Mizoram chhunga Cancer hluar deuh - Chaw kawng, Chuap, Pumpui, Chhul hmawr leh Hnute Cancer avangin chhungkaw tamtak lungngaiin an rum mek a. Mi tam zawk ten Cancer hi a stage hmasa lama hmuhchhuah chuan a la tihdam theih a ni tih an hriat a; mahni in Cancer vei leh vei loh an inhriatdan te pawh zirtir sauh sauh a tul tak zet a ni, a ti bawk.

Larsap chuan Mizoram chhunga Cancer veiten an vei chhan langsar zual chu - Sarep/thlai rep ei tam, Zu leh ruihlo chin uar, Vaihlo leh a kaihhnawih khawih nasat bakah nitin hun hmandan hrisel lo lutuk te a ni tih mithiamte chhuichhuahdan a ni tih a sawi a. Heng thil \halo te hi sim theih a nih thu a sawi a. Mi \hahnem ngaite Campaign-na zarah Vaihlo kaihhnawih khawih pawh kum 2009-10 ah 67.2% ni \hin chu kum 2017-18-ah chuan 57.8%-ah a tlahniam tawh tih sawiin, hei hian \hahnem ngai taka inzirtirna chuan awmzia a nei tih a ti lang chiang a ni, a ti bawk.

He Conclave-ah hian Hmarchhak biala State tinte leh State pakhat bika Cancer hluar zual te ngun taka sawiho leh chhuiho a ni a. Mizoram-ah chuan Pumpui Cancer a hluar bik a, khawvel pum huapa Pumpui Cancer tamna Japan nen a inangkhat a ni. Hei hi mithiamte chuan, Tuibur, Sahdah, Vaihlo zuk chi, Vaihlo hmuam leh thial chi, Kuhva bakah Sarep leh Chawhmeh rep ei leh chin luat vangah an puh a ni.

He hun hmanna ah hian Cancer mahnia hmuhchhuah leh hriat awl deuh bik - Hnute Cancer (Breast Cancer), Chhulhmawr Cancer (Cervical Cancer), Chuap Cancer (Lung Cancer) bakah nghawng chin chunglam- chawkawng, lu leh hmai Cancer (Head and Neck Cancer) te a tir lama a rawn lanchhuahdan leh mahnia lo inhmuhchhuahdan te mipui hriat atan tarlan a ni a. Phailam-a Doctor thiamte leh Mizoram Doctor thiam tak tak ten hun \hen 4-ah Cancer chungchanga thupui \hen hrang hrang uluk taka thlur bingin sawihona leh inrawnkhawmna an nei a ni.