Duhoma thusawi a diklo tih MNF in an sawi

MNF Party chuan ZPM Legislature Party Leader, Lalduhoma’n MNF chu Citizenship Amendment Bill a hlauhawm loh zawng hlira \hahnem-ngai taka thu thehdarha a puh chu thudik lo a ni tih an sawi.

Hemi chungchanga nimin a thuchhuah an siamah MNF Party chuan Citizenship Amendment Bill 2016 hi MNF chuan engtik lai mahin a hlauhawm loh thu a la sawi lo tih tarlangin, he Bill dodalna leh duhlohna thu hi vantlang hmaah leh chanchinbu mite hmaah MNF President, Zoramthanga'n \um engemaw zat leh Vice President, R.Tlanghmingthanga'n an lo sawi daih tawh tih an tarlang a. He Bill hi Mizote tan a bikin a hlauhawm em avangin a duhlo hul hual tih tarlangin, Lok Sabha-ah pass tawh mahse Rajya Sabha-ah a tlang lohna turin tun thla ni 10-a Chief Minister, Zoramthanga hova Council of Minister Meeting chuan a theihna hmun apiangah hma a lak zel tur thu a lo passed tawh zawk tih an tarlang bawk.

MNF thuchhuah chuan he Bill hi Parliament-a sawiho a nih hma khan Central thuneitute hnenah Mizoten kan duhlo a ni tih thu thlena sawipuitu lo awm tawh mahse, Parliament (Lok Sabha)-ah sawiho-a pass a ni ta tho tih tarlangin, Rajya Sabha-ah erawh chuan a tlang thei ta lo tih an tarlang a; chumi hnuah tuna Delhi-a cham mek Mizoram Chief Minister, Zoramthanga chuan tun thla ni 14-ah Prime Minister, Narendra Modi chu Citizenship Amendment Bill-2016 kan duh loh chungchang hi khunkhan takin a sawipui leh tawh tih an tarlang bawk.