Nakum-a Lok Sabha inthlanpuia hman turin Electoral Roll ennawn hna thawh \an a ni

Nakum-a Lok Sabha inthlanpui neih tur inbuatsaihna chi khat atana rampuma Electoral Roll ennawn hna thawh tur chu nimin khan Mizoram-ah neih \an niin Serchhip-ah pawh Integrated Draft Roll tarchhuah a ni a. Electoral Roll siam thar chu nakum February 22-ah tarchhuah tura ruahman a ni.

Nakum January ni 1-a kum 18 tling chin te laa Electoral Roll Special Summary Revision neih tur atana Integrated Draft Electoral Roll hi Serchhip District Election Officer, Sangchhin Chinzah chuan nimin chawhma dar 11:30 khan a Office Chamber-ah tlangzarhin, Mizoram Assembly inthlanpui kan neih zo chauh chungin nakum-a inthlanpui kan neih leh tur atan Electoral Roll ennawn hna chu thawh leh nghal tur a nih thu sawiin, tun \uma Electoral Roll Special Summary Revision neih turah hian kumin September thlaa Electoral Roll tarchhuah taka thun thar te bakah January 1, 2019-a kum 18 tling chin te chu thunluh an nih dawn thu sawiin, January 1, 2001 hmalam-a piang te chu Roll-ah hian thun theih an nih dawn thu a sawi a. Serchhip District chhunga Assembly bial hrang hranga vote nei thei zingah mipa aia hmeichhia an tam zawk thu pawh sawiin, mipa 1000 zelah hmeichhe vote nei thei 1048 awm ang an nih thu a sawi bawk. District Election Officer chuan nimin a Draft Electoral Roll tharchhuah a\anga nakum January 25 thlengin hming thun thar, paih ngai leh siam\hat ngai te tan dilna thehluh theih a nih dawn thu sawiin, heng dilna te hi enfiaha siam\hat ngai te siam\hat a nih hnuah nakum February ni 22-ah Final Electoral Roll chu tarchhuah leh a nih dawn thu a sawi bawk.
Integrated Draft Electoral Roll tarchhuah taka a lan danin Serchhip District-ah Assembly bial pathum (3) awmin vote nei thei mipa 24,256 leh hmeichhia 25,061, an vaiin 49,317 an awm a, heng zinga 337 te hi Service Voters niin Service Voters-ah hian hmeichhia pahnih (2) an awm bawk. 26-Serchhip (ST) AC-ah Polling Station 23 awmin vote nei thei mipa 8542 leh hmeichhia 9470 an awm a, vote nei thei zat hi 18,012 niin 27-Tuikum (ST) AC-ah Polling Station 29 awmin vote nei thei mipa 7682 leh hmeichhia 7779, an vaiin 15,461 an awm a, 28-Hrangturzo (ST) AC-ah Polling Station 25 awmin vote nei thei mipa 7697 leh hmeichhia 7810, an vaiin vote nei thei 15,507 an awm a, Servic Voters 84 an awm bawk.

Comments

Popular posts from this blog

PAN CARD an tih teh fo hi - Laldinpuia