Naktuk a\angin Zofest hmang dawn

Mizo Zirlai Pawl (MZP) huaihawtin naktuk, Dec. 4 a\anga tun thla ni 7 thleng khian Reiek khua ah Zofest neih a ni dawn.

MZP General Hqrs. hruaitute hian Inrinni khan Aizawl Press Club-ah an President, L. Ramdinliana Renthlei hovin Zofest hman tur chungchang ah thuthar thehdarhtute an kawm a, he hunah hian MZP hruaitute chuan Zofest chu kum 2002 a\ang khan MZP-in a buatsaih a, tun \um hi a vawi 8-na tur nia sawiin, ram chhung leh ram pawn a\angin Zohnahthlak hnam peng hrang hrang 30 chuang an fuankhawm dawn niin an sawi a. Kumin a he hun hmanna ah hian Myanmar MP, Ebenezar Siami chu khuallian tura sawm a ni tih sawiin amah \awiawm tur hian MP dang 3 an rawn tel dawn niin a sawi. L. Ramdinliana Renthlei chuan, Zofest thupui atan ‘Insuihkhawm leh zai i rel ang u’ tih hman a ni ang a, inkhawmpui chhung hian Dr. C. Lalawmpuia Vanchiau thuziak zirho a ni ang a, hei bakah hian khawvel huapa Zofate ti hming\ha tu Lalremsiami, Hockey player leh ritchawichak Jeremy Lalrinnunga leh Zofest neih theihna atana sul lo sutu Manipur-a Lalthuthlungliana te an chawimawi dawn niin a sawi. L. Ramdinliana Renthlei chuan, ZOFEST-in a tum chu mahni hnam leh unau, chipui inhre tawn lova hun rei tak awm tawh te huikhawm a, thlahkhat, unau thisen inzawm an nihzia hriattir niin a sawi bawk. Kumin a Zofest hmanna atan hian Reiek khua ah Pandal sak niin mi 1000 leng tura beisei a ni.