MNF Party in lawmthu sawina hun an hmang

SEDP kan sawi \hin kha kan kalpui dawn - Zoramthanga

MNF Party chuan nimin khan Aizawl-a Mizo Hnam Run-ah 'Pathian hnena lawmthu sawina hun' an hmang a, he hunah hian MNF MLA thar mi 26-te chu Thangchhuah Diar bahtir an ni bawk. He hunah hian an President, Zoramthanga chuan SEDP chu an kalpui dawn tih a sawi bawk.

Nimin-a MNF Party in 'Pathian hnena lawmthu sawina hun' an buatsaih ah hian MNF President leh MNF Legislature Party President, Zoramthanga chuan lawmthu sawina hun an neih theihna tura Pathian in hlawhtlinna a pek avanga an lawm thu a sawi a. A lo sawi tawh angin an sawrkar hunah Traffic Jam pumpelh nan Kawng chhawng leh Parking an siam dawn tih pawh sawiin, awlsam taka tih nghal zung zung theih erawh a nih loh thu leh nasa taka hma an lak dawn thu a sawi a. “MNF hi Pathian in \ul a tih hunah min sawp hrep a, tul a tih hunah malsawmna nasa takin min vur leh \hin a. Kawng lakah kan Pathian hian min kalsan ngai lo. Kum 2008 inthlanah MLA 3 lek neiin min sawp a, kum 2013-ah 5 min pe leh a. Kum 2013-a kan MLA neih zat 5 ang kha tunah Congress unaute a pe ve leh thung a ni. Kan sawrkarna turin ZNP kakpui a titliak phawt a, hmun thuma \hena hmun hnih lai chu kan lawmlut ang. Congress kakpui a tichim leh a, Pu Zira leh Pu Rina te, midang tam tak a rawn tirlut a. A za tel, sang tel kan lawmlut a ni. Vote thlak zawh dawn thlengin kan inlawmlut a. Heng te hi kan theihna vang a ni lo, Pathian remruat a ni. Tlinna sang ber Pu Ruatkima vote 2720 leh tlinna hniam ber Pu Chhantea vote 3 pawh Pathian ruat a ni a, inhlawhfa ah duli hlawh ve ve ang tho kan ni,” a ti.
MNF President, Zoramthanga chuan SEDP an sawi \hin kha an kalpui dawn tih sawiin, “Tunhmaa sawrkar kan hmuh tawh zawng zawng kha khum tura kal kan tum a, SEDP hi mitin a neitu kan ni dawn a ni. Kan Flagship Programne Mau ni lo, Raw lian chi pawh nasa takin kan kalpui ang. Langtlang sawrkar mi zawng zawngin an hriatpui theih tur kan siam dawn a, langtlang sawrkarah chuan corruption a awm thei dawn lo a, chutiang chuan sawrkar kan kalpui ang. India ram leh khawvel hmun danga chanchin\ha hril turin Mizote tluka a thuam hnamdang an awm lo. Malsawmna ruai chawi hniam turin MNF hi Lalpa'n a ko a, MNF chu a hreipui, tuthlawh leh chempui-ah min hmang dawn a ni. Malsawmna hi Minister bial-ah tla na bik lovin bial tinah inang tlang dial dialin kan kalpui ang,” a ti bawk.

Popular posts from this blog

PAN CARD an tih teh fo hi - Laldinpuia