MLA thlan thar zinga 20 te vawikhat tlinna an ni

Mizoram Assembly inthlanpui a bial 40-a MLA thlan thar 39 zinga a zatve aia tam 20 zet chu MLA vawikhat an tlinna a ni a, an zinga 14 te chu bial 26 a hnehna chang MNF MLA te an ni a. ZPM MLA thlantlin 8 zinga 5 chu a vawi-khatna a tling an ni a, Congress MLA tling 5 zinga pakhat chu a vawikhatna a ni bawk.
A vawikhatna atana MLA tling leh MLA tling zinga naupang ber Champhai South a ding TJ. Lalnuntluanga chuan Chief Minister, Lal Thanhawla a hneh a. Aizawl East-II biala Finance Minister, Lalsawta hnehtu Robert Romawia Royte (MNF) te, Aizawl North-III biala PWD Minister, Lal Thanzara hnehtu C. Lalmuanpuia te, Lunglei North biala Social Welfare Minister, PC. Lalthanliana hnehtu Dr. Vanlal\anpuia te chu a langsar zual an ni.
Anni bakah hian Aizawl South-III bial MLA leh Agriculture Minister, K.S. Thanga hnehtu Dr. Lalnunmawia (MNF) te, Mamit bialtu Transport Minister, John Rotluangliana hnehtu H. Lalzirliana te leh Aizawl West-III a Opposition Group Leader, Vanlalzawma hneht V.L. Zaithan-zama (ZPM) te chu a langsar zingah an tel bawk.
East Tuipui a MNF candidate tling, Ramthanmawia (kum 61) leh Champhai North biala MNF candidate tling Dr. Z.R. Thiamsanga (kum 60) te chu vawikhat tling zinga upa berte an ni a. A vai thu a chhutin MLA 39 te kum zat chawhrual hi kum 54.05 a ni a. MLA tling upa ber chu Tuichang bial a\anga tling Tawnluia (kum 75) leh a naupang ber chu Champhai South bial a thlan tlin kum 39 mi TJ. Lalnuntluanga a ni.

Popular posts from this blog

PAN CARD an tih teh fo hi - Laldinpuia