Serchhip District-a Assembly inthlanpui neih ah Bial pathum-ah Vote za zela 84.11 a tla phak

Serchhip District-a Vote tlak dan tlangpui

Mizoram State Assembly 8-na din tura inthlanpui chu nimin khan Serchhip District-ah tluang taka neih a ni a, khawi hmun a\ang mahin thil duhawmlo a thlen hriat a ni lo a, Serchhip District chhunga Assembly bial pathum (3) ah a vaiin Vote zaa 84.11 a tla phak.

Mizoram State Legislative Assembly inthlanpui vawi 8-na neih ah hian ruahman lawk angin nimin zing dar 7:00 \ang khan Vote thlakna hun hawn a ni a, Polling Station \henkhat ah erawh VVPAT khawl in hna a thawh mumal theihloh avangin a theih anga siam nghal niin Vote thlak pawh hi hmun \henkhat ah chuan a tlai a, amaherawh chu Polling Station hrang hrangte hi Sector Officer ten uluk taka vilin heng harsatna te pawh hi enfiahin a theih anga buaipui nghal a ni a, hei vang hian mipuite tana harsatna thleng zui erawh a awm hriat a ni lo a, tluang takin Vote hi thlak a. Nimin a Vote thlak hun tura ruat, tlai dar 4:00 thleng khan Vote tla \ha thawkhatin Polling Station \henkhat ah erawh Vote la thlak hman lo an awm avangin dar 4:00-a Polling Area-a awm te chu Vote thlak tir leh vek an ni a, Vote thlak zo har ber nia hriat, Thenzawl-III Polling Station-ah chuan nizan dar 8:00 vel khan Vote thlak hi an zofel a ni. 

Serchhip District-a Assembly bial hrng hrang zingah 26-Serchhip (ST) AC-ah vote nei 18,012 zingah nimin khan mi 15,060 ten vote thlak in vote za zela 83.61 a tla phak a. 27-Tuikum (ST) AC-ah chuan vote nei 15,461 zingah mi 13,473 ten Vote thlakin hei hi za zela 87.14 a tling a, Serchhip District chhunga Vote tlak \hatna ber Constituency a ni a. 28-Hrangturzo (ST) AC chu Bial pathum zinga Vote tlak \hatlohna ber niin Vote nei mi 15,507 zingah mi12,667 ten Vote thlakin hei hi za zela 81.69 a tling a ni. Heti hian Serchhip District pumah vote nei mi 48,980 zingah nimin khan mi 41,200 ten vote thlakin hei hi za zela 84.11 a tling bawk a, hei hi Service voters leh Postal Ballot ten an la belh leh dawn a ni.

Nimin a Serchhip-a inthlanpui neih ah hian Veng hrang hrangah MPF te duty in Vote thlak turte an lo buaipui bakah pianphunga rual-banlote leh damlo Vote thlak tur hruai leh thlah hna an thawk a, hei hian inthlan boruak pawh a ti dai viau nia hriat a ni bawk.

Tun \uma Assembly inthlanpui ah hian ruahman lawk angin Inthlan buaipuitu (Polling Party) hmeichhia vek an nihna hmun, Pink Polling Station (Dingdi Polling Station tia vuah) chu Assembly bial hrang hrang ah pakhat \heuh siam a ni a, heng Polling Station te tlawhtu kan Palai zawhna chhangin inthlan buaipuitute chuan mipui te zarah harsatna nei lova Vote thlak kalpui a nih thu leh inthlan buaipuitute pawhin harsatna an neih loh thu an sawi bawk.

He inthlanna a hman EVM leh VVPT te hi Vote thlak zawk a nih veleh inthlan buai-puite hian Serchhip DC Office an panpui nghal a, EVM leh VVPAT te chu Pindan Awmkhauh (Strong Room)-ah dahluh nghal zel niin nizan zanlai pelh hnu khan rawn thleng kim hman tura beisei a ni a. Heng te hi Pindan Awmkhauh ah hian dahlut vekin Political Party te hriatpuina a khalh leh tur niin thla thar ni 11-a Vote chhiar hunah hawn leh tur a ni ang.