Mizoram pumah Assembly inthlanpui harsatna lian awm lovin neih a ni

Mizoram Legislative Assembly inthlanpui atan nimin khan tluang taka vote thlak a ni a, Mizoram pumah thil duhawmlo liantham thleng a awm hriat a ni lo.
Mizoram Asssembly inthlanpui neih chungchangah hian nimin tlai dar 4:30 khan Chief Electoral Officer, Ashish Kundra chuan Press Briefing neiin intlanpui neih chungchang hi a sawi a, he hunah hian Media mite hmaah CEO chuan nimin tlai dar 4:00 thlenga Vote tla zat chu Vote nei zawng zawng a\anga chhuta 71% a ni a, vote thlak hun tawp dar 4:00 rik hmaa Vote thlakna huamchhunga voter awm te chu Slip pek an ni a, slip nei ho zawng hian vote an thlak chhunzawm tur thu a sawi. Mizoram CEO Ashish Kundra chuan Election Commission of India (ECI) in inkaihruaina a siam angin tlai dar 4:00 khan Official in Vote thlak hun chu khar a nih thu a sawi a. Polling Station hrang hranga vote la thlak hman lo, dar 4:00 hmaa Vote thlakna huamchhunga awm hman te chu Polling Official ten slip pe in vote an thlak chhunzawm tir an nih thu leh tlai dar 4:00 thlenga CEO hnena report thehluh ang chuan Mizoram pum a Vote tla zat chu 71% a ni na in, Vote la thlak chhunzawm a nih avangin Vote tla zat hi a pung chho tura rin a ni a nih thu a sawi a. Report thehluh chinah Serchhip District-ah 81%, Mamit District-ah 70%, Kolasib District-ah 77%, Aizawl District-ah 65%, Champhai District-ah 74%, Lunglei District-ah 77%, Lawngtlai District-ah 69% leh Siaha District-ah 73% vote a tla a ni.
Hetihlai hian Bru Transit Camp, Tripura-a awm mek te tana Vote thlakna tur hmun siam, Kanhmun-ah pawh boruak muanawm tak hnuaiah Vote thlak a ni a, hriat theih chinah Kanhmun-a Special Polling Station hrang hranga Vote thlak zat chu 6284 niin hei hi Bru Vote vote awm zawng zawng 11,987 a\anga chhiara 52% a ni a. Polling station \henkhatah tlai dar 4:00-a Voting Area a awm hman, Vote la thlak chhunzawm mek an awm bawk a ni.
Ashish Kundra chuan India ram hmundang te tan Mizo mipui ten entawn tlak khawpa mawiin vote an thlak chhunzawm leh a thil lawmawm tak a ni, a ti a. YMA, NGO’s leh Zirlai pawl hrang hrang te bakah Mipui inpekna a zarah inthlan thianghlim takin neih a ni, a ti bawk.

Popular posts from this blog

PAN CARD an tih teh fo hi - Laldinpuia