Serchhip District-ah inhnukdawk awm lovin Bial pathum-ah Candidate 19 an awm dawn

Mizoram Assembly inthlanpui chuh tuma hming pelut te tana inhnuhdawh theih hun chu nimin tlai dar 3:00 khan khar niin Serchhip District chhunga inthlanpui chuh tum te zingah inhnukdawk an awm lo a. Serchhip District Election Officer, Sangchhin Chinzah chuan nimin tlai khan thuthar thehdarhtute kawmin an inbuatsaihna a hrilhfiah bawk.

Tun thla ni 28-a Mizoram Legislative Assembly inthlanpui chuh tum te tana hming pekluh hun tun thla ni 9 thlenga hawn ah khan Serchhip District chhunga inthlan chuh tumin Assembly bial 3-ah mi 19 ten Nomination Paper an thehlut a, heng Nomination Paper te hi tunkar Thawh\anni khan enfiah a nih hnuah pawm vek niin inhnukdawk duh te tan hian nimin tlai dar 3:00 thleng khan hun hawn leh a ni a, he hun hawn chhung hian inhnukdawk an awm tak loh avangin Serchhip District chhunga Assembly bial pathum chuh tur hian Candidate 19 an awm dawn ta a ni.
Assembly inthlanpui neih turah hian 26-Serchhip (ST) AC-ah Candidate 7 awmin Serchhip District chhunga bial pathum awm zinga Candidate tamna ber a ni dawn a, heng Candidate te hi Indian National Congress (INC) a\angin Lal Thanhawla, Bharatiya Janata Party (BJP) a\angin Lalchunglura, Mizo National Front (MNF) a\angin C. Lalramzauva, Peoples Representation for Identity and Status of Mizoram (PRISM) Party a\angin Vanlalruata, National People’s Party (NPP) a\angin Kapliana Pachuau, ZPM a\anga Independent-a chuh, Lalduhoma leh Zoramthar a\anga Independent-a chuh Zaichhawna Hlawndo te an ni.
27-Tuikum (ST) AC-a inthlanna chuh turin Canddiate 6 an awm a, chung te chu INC a\angin Sangzela Tlau, BJP a\angin Lalnunmawia Chhakchhuak, MNF a\angin Er. Lalrinawma, PRISM Party a\angin RC. Rohmingthanga leh Independent-a chuh tur ZPM a\angin PC. Vanlalruata leh Zoramthar a\angin Lalruatfeli Hlawndo te an ni. 28-Hrangturzo (ST) AC-ah pawh Candidate 6 bawk awmin heng te hi INC a\angin Vanlalawmpuii Chawngthu, BJP a\angin K. Sangzuala, MNF a\angin Lalchamliana leh PRISM Party a\angin RL. Liantluanga bakah Independent-a chuh tur ZPM a\angin Lalthansanga leh Zoramthar a\angin Lalawmpuia Renthlei te an ni.
Serchhip District-a Assembly inthlanpui nei tura inbuatsaihna kal mek chungchangah hian nimin tlai khan Serchhip District Election Officer, Sangchhin Chinzah chuan tualchhung thuthar thehdarhtute chu a Pisa-ah kawmin heng Candidate te Hming leh an Symbol turte a tlangzarh a. He hunah hian District Bawrhsap chuan in-thlan chuh tura Nomination thehlut te Paper chu an enfiahna ah hrilhfiah ngai te in hrilhfiahin hnawl a awm loh thu leh Serchhip District-ah Candidate 19 an awm dawn thu a sawi a. Election Commission of India in EVM-a Candidate te hming dah dan tur indawt a ruahman te tarlangin, tun thlengin Model Code of Conducts bawh-chhiatna ala awmloh thu a sawi a. Tunah hian Election duty turte Postal Ballot tur chu an buaipui mek thu leh ni 16 a\anga Postal Ballot a Vote thlak \an a nih dawn thu sawiin, EVM hman turte pawh thliarfel a nih tawh thu leh Strong Room pathum an siam ah a hran \heuha dah a nih tawh thu a sawi a. Nimin khan Polling Personnel te in\hen dan tur pawh tihfel a nih thu sawiin, an kalna tur Polling Station erawh tihfel ala nih loh thu a sawi bawk.
He hunah hian Serchhip SP, R. Sathiya-sundaram pawhin venhimna hna an thawh dan te sawiin, tun thlenga harsatna leh buaina thleng ala awm loh thu a sawi a. An hmalakna hrang hrangte pawh Police Observer enpuina hnuaiah chak taka bawhzui niin Serchhip District chhunga lirthei rawn lutte enfiah hna pawh chak taka an kalpui reng thu leh CAPF te pawhin an hna an thawh reng thu a sawi bawk.

Popular posts from this blog

PAN CARD an tih teh fo hi - Laldinpuia