Ramchhung hmundangte rualin Serchhip-ah ‘National Press Day’ hman a ni

Rampuma Press mite zalenna leh mawhphurhna inhrilhhriatna Ni atana hman \hin, National Press Day chu nimin khan ramchhung hmun hrang hrangah hman niin Serchhip-ah pawh District Information & Public Relations Officer (DIPRO) Office buatsaihin urhsun taka hman a ni.

Serchhip-a a vawikhatna atana National Press Day puala hun hman Serchhip DIPRO Office Chamber-a neih ah hian Serchhip DIPRO, K. Saitluanga chuan National Press Day chu Press mite pawimawina inhrilhhriat thar lehna ni atana hman \hin a nih angin Serchhip District chhunga thuthar thehdarh hna thawktu zawng zawngte chu mipuite kaihruaitu, an nitin ti ti tur leh an ngaihtuahna chhawpchhuah saka an ngaihsan siam saktu an ni tih in hre thar fo turin a chah a. Press mite chu mipuite kawng dika hruaitu leh sawrkar leh mipui inkara Palai hna a \ha zawnga thawk \hintu ni zel tura chahin, India ram Danpui hnuaiah Right to Freedom of Press kan neih angin zalen taka an hna te an thawh zel a beisei thu a sawi a. Press Council of India in Press mite awmdan tur (Ethics & Conducts) a zam te \ha taka zawm chunga ram rawng bawl zelturin duhsakna a hlan bawk.

He hunah hian MJA Serchhip District President, C. Ramengmawia pawhin thu sawiin, a vawikhatna atana Serchhip-a National Press Day hman ani chu lawmawm a tih thu a sawi a. Kum dangah pawh nasa zawk leh hlawk zawka hman dan ngaihtuah zui zel a chakawm hle dawna a hriat thu sawiin, a vawikhatna atana Serchhipa hman a nih theih nana hmala tu DIPRO Serchhip chungah lawmthu a sawi bawk.

National Press Day-ah hian Press Council of India chuan thupui hrang hrang hmangin Seminar te a buatsaih \hin a, Aizawl-ah chuan Vawiin khan ‘Journalism Ethics & Challenges of Digital Era’ tih thupui hmangin Seminar neih a ni a. He hun hi I&PR Director, David L. Thangliana chuan kaihruaiin Lalbiaktluanga, I&PR Secretary chuan khuallian niin a hmanpui a, I&PR Secretary chuan khawvel changkanna ina a ken tel Internet te avang hian thu puandarh kawngah pawh kan chak ta hle a, thuthar rintlak loh leh belhchian dawllo pawh a tam phah hle a ni, a ti a, kan thuthar thehdarhtute chu mipui rin ngam an nih theih nan chuan thu an chhuah danah Journalist ten Principle of Ethics an zawm a, an vawn nun tlat a pawimawh hle a ni, a ti bawk. He hunah hian Dr Irene Lalruatkimi, Asst. Professor, Deptt. of Mass Communication, MZU chuan Paper a present a, MJA Member mi \hahnem tak an tel a ni.

National Press Day hi kumtin Nov. 16-ah hman \hin niin Press Council of India in a taka hna a thawhna ni champha ah hman \hin a ni a. Press Council of India hi July 4, 1966-ah India Parliament chuan Press Council Act, 1965 Dan hmanga India rama Press mite vil tura a din niin he Dan hi Nov. 16, 1966-ah kalpui \an a ni a, he Ni hi National Press Day-ah hmangin kumtin hman zui a ni ta a ni.