Party dangin MNF an beihrawn - Zoramthanga

MNF President, Zoramthanga chuan Party dangin ten MNF chu sawrkar tura an ngaih avangin an beihrawn nasa hle tih sawiin, BJP chu an thawhpui loh thu a sawi bawk.

Nimin-a Aizawl Mizo Hnam Run-a Chhung Inkhawm an neih ah MNF President, Zoramthanga hian thu sawiin MNF chu BJP nen an thawhho loh zia hre chungin thawkho ah an puh lui tlat tih a sawi a, “Pathian leh kan ram tan tih leh Hindutva a kalkawp thei lo. Thawk dun tak tak zawk chu Congress hi an ni. Congress President Pu Lal Thanhawla’n ‘BJP nena kan thawhhona kan chhuchat’ tiin hmanni deuhah khan a puang a. Chutihlai chuan tun thleng hian Chakma Autonomous District Council-ah Congress leh BJP hi an la thawk dun reng a, sawrkarna an la siam dun reng a ni,” a ti.

MNF President chuan MNF High Command-in kum 2018 inthlan chu tumah thawhpui lovin maldin tur, tiin an rel tih pawh sawiin, Chumi ang chuan MNF hian bial zawng zawng bial 40-ah candidate kan siam a, BJP pawhin an theihna apiangah an siam a, kan thawhho lohzia chu mipui hi a hrechiangtute kan ni,” a ti a. Kum 2014 MP thlan zawh khan Parliament lama Congress kaihruai UPA nena thawhho ai chuan tiin MNF, MPC leh ZNP chuan BJP kaihhruai NDA an thlawp tih a sawi bawk.

Zoramthanga chuan Tuichawng bial-ah Congress leh BJP in Candidate daha hun engemaw cheng an ngaihchan hnuah candidate an dah ve ta tih sawiin, party dangin Candidate an ah laia dahlo bik nih chu an duhloh thu a sawi a. “Vai party pahnih BJP leh Congress kuta kan rama bial pakhat Tuichawng dah ringawt mai chu kan remti lo. A ram neitu ngei MNF hian Tuichawng bialah candidate kan dah ve ta a, a tlin ngei pawh kan beisei sang hle a ni,” a ti bawk.