MZP hruaitute Mizo Hnam Run-ah an leng

MZP General Hqrs. hruaitu ten Political party hrang hrang an kawmna kal zelah nimin khan Aizawl Mizo Hnam Run tlawhin MNF party hruaitute nen inkawmna an nei a, MNF sawrkar a din huna hmalak an tumna hrang hrang an sawiho.
He inkawmna hunah hian MZP President, L. Ramdinliana Renthlei chuan a hma lama party Office-a an lo len tawhna an thusawi te tarlang nawn lehin ramri chungchang, Education siam\hat chungchang, Chakma Foreigner chungchang leh Lokayukta chungchanga MNF Party sawrkar hmalak tum dan a zawt a. Heng MZP hruaitute hi R. Tlanghmingthanga, Senior Vice President leh hruaitu dang ten lo dawngsawngin MNF Party-in Sawrkarna an lo siam anih chuan Mizoram leh Assam inrina tak tak Sq. Miles. 509 chu neihlet leh tumin MNF party chuan nasa takin hma a la dawn tih an lo hrilh a. Tuna Survey of India te Mizoram leh Assam inrina MAP hi phuahchawp ramri a nih avangin MNF party chuan an pawm lo tih sawiin, Mizoram ramri zawng zawngah Force pawh dah belh anih tur thu an sawi bawk.
Education chungchanga hmalak an tumna zawhna chhangin MNF hruaitute chuan Mizoram School Education Department tan tun aia tam zawk Budget-a dah an tum thu leh School timing pawh khawtlang leh mipui dinhmun a zira ennawn te, Department dangte angin Education Service Rules leh Department enkawltu tur pawh MPSC kal tlanga lak a nih tur thu te an sawi a, Khawpui chhung leh thingtlanga zirtirtu dinhmun inthlau lutuk chu rualkhai taka kalpui an tum thu leh Zirna In leh zirna pawh \ha thei ang bera kal pui a nih tur thu an sawi bawk.
Chakma Foreigners chungchang-ah pawh MZP hruaitute zawhna chhangin MNF party hruaitute chuan, ‘MZP ten ram leh hnam humhalhna kawnga Foreigners duhlohna leh huatna thinlung an nei chu a ropui an tih thu sawiin, “MNF chuan hun kal tawh leh hmasa lamah pawh Chakma Foreigners chu nasa takin a lo dodal \hin a. Chutiang rilru chu tunah pawh MNF party chuan a la pu reng a. A la dodal zel dawn a ni,” an ti a. “MNF Party-in Sawrkarna a lo chang anih chuan a \ul dan a zirin Chakma Foreigners endik hnatlang kan nei ang,” an ti bawk.
Eirukna dona kawnga Lokayukta din chungchang pawh he hunah hian sawiho niin MNF Party hruaitute chuan, Lokayukta chu Mizoram Assembly pawhin House a lo passed tawh leh hmang tura a lo rel vek tawh avangin, hetianga eirukna leh hlemhletna chhuia hrem theitu tur dah hi thil \ha tak a nih thu leh kan ram pawhin a mamawh tawh hle tih an sawi a. “MNF Party chuan sawrkarna a lo chang anih chuan Lokayukta chu rang taka hman nghal tur a ni,” tiin, MZP hruaitute hmaah MNF party hruaitute chuan an sawi bawk.

Popular posts from this blog

PAN CARD an tih teh fo hi - Laldinpuia