MZP hruaitute MPCC Office-ah an leng


Lokayukta hman tura peihfel a ni tawh - MPCC



MZP ten Assembly inthlanpui neih tur puala Political Party hrang hrang Office an tlawh mekah nimin khan Mizoram Pradesh Congress Committee (MPCC) Office tlawhin ramri chungchang, Education chungchang, Chakma Foreigner chungchang leh Lokayukta chungchanga hmalak an tum dan leh hmachhawp an neih te an sawipui.

Nimin a MZP in MPCC Office an tlawhna ah hian MZP President, L. Ramdinliana Renthlei leh a thawhpui te hi MPCC Vice President, CL. Ruala leh hruaitu dang ten lo dawngsawngin MPCC hruaitute chuan ramri chungchangah Mizoram State ramri mai nilo, International ramri thlenga hma an lo lak tawh thu sawiin, Mizoram leh Assam State inrinna pawh Mizoram Chief Minister hnenah leh Central lama thuneitute pawh sawipui vek an nih thu an sawi a. Assam State Sawrkar in North East State dangte nen ramri-ah buaina an nei vek tih sawiin, Mizoram MP ten Assam Chief Minister sawipuiin, Assam Chief Minister chuan Mizoram State leh Assam State-te chuan ramri buai an neih loh thu leh a hriat loh thu a sawi tih an sawi a. MPCC chu ramri fel theihna’n kan document neihte nen Supreme Court a kal turin a inpuahchah mek a. MPCC chuan sawrkarna a siam leh anih chuan Mizoram State boundary enkawl bik tur Boundary Commission an din dawn tih an sawi bawk.
Mizoram Education chungchanga MPCC Party hmalak tumna pawh MPCC hruaitute chuan sawiin, Education Service Rules an duan mek thu leh he rules hmang hian Zirtirtu hnalak leh Mizoram hmun hrang hranga zirtirtu indaihlohna chu nasa takin sutkian a nih dawn thu an sawi a. MPCC party chuan 'The Mizoram Rural Local Government (Panchayat) Bill 2018' pawh an duan mek thu sawiin, MPCC party chuan sawrkarna a siam leh anih chuan Local Government hnenah zirtirtute insawn leh awm danah thuneihna a pe dawn tih an sawi bakah thingtlang lama zirtirtu tan quarter sak dan tur ruahmanna an duan thu leh zirlaite hmasawnna turin Study Tour an buatsaih \hin dawn thu an sawi bawk.
Mizoram chhunga foreigners awmte chu a haw em em tih pawh sawiin MPCC hruaitute chuan a bik takin Chakma foreigners pung chak lutuk chu pawi an tih thu an sawi a. Chakma hnam zingah hian hnam peng chi hrang hrang an awm thu leh an hnam chipengah \hendarh dan tur ngaih-tuahna an hman mek thu an sawi.
Lokayukta chungchangah Assembly in a pawm tawh a nih avangin Mizoram sawrkar chuan chak taka hma la nghalin, tunah hian hman mai theih tura peih anih tawh thu sawiin, Mizoram State Assembly zawh veleh hian hman theih tura engkim ruahman tawh a nih thu an sawi bawk.

Popular posts from this blog

PAN CARD an tih teh fo hi - Laldinpuia