Mizoram Assembly inthlanpui neih tur atan Campaign theih hun khar a ni ta

Mizoram Legislative Assembly inthlanpui neih tura campaign chuan a vawrtawp a thleng ta a, nimintlai dar 4:00 khan inthlanpui atana campaign theih hun pawh tawpin Political Party te chuan nimin tlai thleng khan Campaign hi an nei a ni.

Rorellai Indian National Congress chuan Assembly inthlanpuia campaign tawp Ni, nimin khan Serchhip-ah Rally neiin Vantlang Inkhawm an buatsaih a. He Rally hi Sailiamkawn a\anga neiin New Serchhip College Peng thleng neih niin hetah hian inkhawm neih zui a ni a, he hun hi MPF Serchhip District kaihhruaia neih niin he huna thu sawitu MPCC President leh Serchhip bial-a an Candidate, Lal Thanhawla chuan thu sawiin naktuk lawkah kum 5 chhunga kan rama roreltu tur kan thlan dawn thu a sawi a, roreltu tur thlang tura ngaihtuahna uluk tak hmang tura he huna kalkhawm te chu chahin, Congress Party chuan Pathian rawn chungin kan ram mamawh ang zel Policy an neih \hin thu a sawi a. He inthlanpui neih turah hian Congress Party Candidate thlangtling turin mipuite chu a chah bawk.

Eptu Pawl lian ber MNF chuan nimin chawhnu khan Serchhip Bazar-a an Campaign Office-ah Campaign kharna hun hi hmangin he hun hi Serchhip East Block MNF Vice President, C. Vanlalsiamthara chuan a kaihruai a, he hunah hian an Party Hqrs. a\angin M. Dawngliana chuan thu sawiin, \awng\ai rualna neih a ni a. Hemi hnu hian Serchhip bial-a an Candidate, C. Lalramzauva chuan thu sawiin amah duhsaktute nen theihtawp chhuaha an campaign thu sawiin, Serchhip bial-ah \um thu ngawt a vanduai zawka a \an tawh avangin mipuite pawhin an khawngaih avanga an vote tlin ngei a beisei thu a sawi a. Serchhip-a piang leh seilian a nih avangin bial hmangaihtu tur a nih thu sawiin, hei hi mipuite pawhin hriatpui se a duh thu a sawi bawk.

ZPM Serchhip District Steering Committee chuan nimin chawhma dar 11:00 khan Serchhip Bazar-a an Campaign Office-ah Chhung Inkhawm neiin Campaign kharna hun an hmang a, he hun hi an Senior Vice Chairman, Upa Lalchhara'n kaihhruaiin Secretary hrang hrang ten report pein \awng\ai rualna neiin hun khar a ni. He hunah hian Upa Lalchhara chuan tun dinhmunah Mizoram politics-ah Rorelna dik leh Pathian ram a thlen theih nan ZPM kan vote tlin a ngai a ni," a ti a. "Kohhran leh tlawmngai pawl zahawmna humhim sak tur leh hleih nei rorelna paih turin ZPM kan vote tlin ngei a ngai a ni," a ti bawk. NPP pawhin nimin tlai khan an Office-ah \awng\airualna neiin an Campaign kharna hun hi an hmang bawk a ni.