Mizoram Assembly inthlanpui neih tur atan inbuatsaihna peihfel thawkhat a ni tawh - CEO

Mizoram Chief Electoral Officer, Ashish Kundra, IAS chuan nimin khan CEO Conference Hall-ah State chhung leh pawnlam chanchinthar lakhawmtute kokhawmin naktuk maia Mizoram inthlan neih tur atan engkim peihfel thawkhat a ni tawh tih a sawi.

Mizoram Chief Electoral Officer (CEO), Ashish Kundra hian nimin tlai khan Candidate-te campaign hun a tawp tawh dawn tih sawiin, District 8-a DEO leh SP te nen an inbiak reng thu leh inthlan ni ah mipuite vote thlak dan tura ruahmanna leh venhimna lam (Police Security) pawh District tinah a \ha tawk vek a ni, a ti a. Tun dinhmunah Mizoram State Inthlan turah hian Assembly Constituency 40 chuh turin Candidate 209 an awm thu te, Service Voter 4363 an awm thu te, Electoral Roll-ah inziak lut zawng zawng chu an zavaiin mi nuai 7.7 an ni a, chung zingah Mipa nuai 3.75, Hmeichhia nuai 3.94 leh pianphunga rualbanlo (PwDs) mi 3915 an awm bawk tih a sawi.

CEO chuan Constituency tinah hmeichhiate chauh vote thlakna tur siam a ni dawn a, Mizoram-ah chuan hmeichhiate vote thlakna tur Pollling Station bikte chu ‘Dingdi’ tih an phuah tih a sawi a, Nimin khan mitdel leh mit lama harsatna neite tan Braille EPIC sem vek a nih thu a sawi a. Vote thlak ni-ah Polling Station thlanchhuah 40 a\angin ‘webcasting’ tih a ni dawn a; Service Voter-te chu Electronic EVM hman tir vek an nih thu a sawi a. Niminpiah Pathianni khan Tripura Camp-a Bru awm ten vote an thlakna tur hmun Kanhmun a tlawh leh thu sawiin, engkim peihfel vek a ni tawh a, Bru Voter zat chu an vaiin mi 12,026 an ni a, Hachhek Constituency-ah Bru voter an tam ber a; Tripura leh Mizoram Border thlengin Tripura sawrkarin motor an ruahman sak vek ang a, Mizoram sawrkarin a senso a tum thung dawn a ni, a ti.

CEO Ashish Kundra chuan Mizoram inthlan turah Mizo mipuiten sawrkar hmalakna zawng zawng theihtawpin an lo thlawp zel a, a bik takin tlawmngai pawlte leh Kohhran lamin inthlan muanawm leh felfai tak neih a nih theih nan theihtawp a chhuahpuina chungah lawmthu a sawi a. Inthlan ni November ni 28 (Nilaini)-ah chuan Mizo mipuite chu ‘hnam hnatlang’ nei leh tura sawmin, vote nei apiang chuan India khua leh tui \ha an nihna angin vote thlak \heuh turin a sawm a ni. Nimin a thuthar thehdarhtute a kawmna hunah hian CEO hi Election hotu pawimawh dangten kawmin inthlanna atana inbuatsaihna hrang hrang inhrilhfiah a ni bawk.