Mizoram Assembly inthlanpui neih tur atan hriattirna tihchhuah a ni ta

Election Commission of India chuan seat 40 awmna Mizoram Legislative Assembly inthlanpui hriattirna nimin khan a chhuah a, Party hrang hrang candidate te hming thehluh hun chu karleh Zirtawpni, Nov. ni 9, 2018 thleng khian hawn a ni anga, inhnukdawk duh tan ni 14 thleng hun hawn a ni ang.

Mizoram Assembly inthlanpui neih tur atan hian tun thla ni 28-ah Vote thlak tur niin ruahman lawk ang chuan zing dar 7:00 a\anga tlai dar 4:00 thleng vote thlak hun hawn a ni anga. Vote tla te hi Dec. ni 11, 2018-ah chhiar a ni anga, inthlan kaihhnawih thiltih zawng zawng Dec ni 13 hmaa zawhfel vek tur a ni dawn a ni.

Mizoram Chief Electoral Officer (CEO), SB. Shashank chuan he inthlanna neih tur atan hian Election buaipuitute lam chu an inpeihfel thawkhat tawh tih a sawi a, State pumah voter 7,68,181 an awm thu sawiin, an zinga 3,93,685 chu hmeichhia an ni a, a bak mi 3,74,496 chu mipa an ni. CEO sawi danin he inthlanna neih tur atan hian Polling Station 1,164 a awm dawn a, Polling Booth zawng zawngah vote thlakna hmanrua EVM leh VVPAT hman a ni anga, Polling Station 125 ah web-casting neih a ni ang.

Tun \uma Mizoram Assembly inthlan neih tur atan hian Observer 33 ruat an ni a, heng te hi General Observer 14, Expenditure Observer 11 leh Police 8 an ni a, venhim hna thawk turin State Police Company 48 leh Central Armed Police Force Company 40 dah an ni bawk.

SB. Shashank sawi danin, kumin inthlanpui thupui atan ‘Accessible Election’ tih hman anih angin, pianphunga rualbanlo te pawhin Polling Booth a vote an thlak ngei theih nan ruahmanna hrang hrang an siam a, rualbanlo voter awmna te zawngchhuakin Polling Booth an thlen ngei theih nan Wheelchair-a zawh theih ramp te pawh an siam a, tun dinhmunah Polling Booth hrang hrang ah heng ramp siam hna hi zaa 90 zawh a ni tawh a ni.

Hetihlai hian Mizoram Chief Secretary, Arvind Ray chuan nimin khan Mizoram Legislative Assembly dinglai chu December ni 15-a hun tawp tur anih thu The Mizoram Gazatte-ah a chhuah a. Sawrkar thuchhuah tarlan danin Election Commission of India hnen a\anga ti tura hrilh anih angin Chief Secretary chuan Mizoram Governor aiawh leh thupek angin India Danpui tlawhchhanin tuna Mizoram Legislative Assembly awm mek chu a hun hma a \hiah a nih loh chuan December 15, 2018 khian a term tawp dawn tih a sawi a, Mizoram chhunga Assembly Constituency zawng zawngte chu an bial chhungah theuh Member of Legislative Assembly (MLA) thlang turin a sawm nghal a ni.