Inthlanpui neih tur inbuatsaihna hrang hrang DEO leh SP in thuthar thehdarhtute an sawipui

Serchhip District Election Officer, Sangchhin Chinzah leh SP, R. Sathiyasundaram te chuan nimin khan Serchhip-a thuthar thehdarhtute kawmin Assembly inthlanpui neih tur atana Serchhip District-a inbuatsaihna hrang hrang kalpui dan an hrilhfiah.

Nimin-a Serchhip DC Office Chamber-a thuthar thehdarhtute an kawmna hunah hian District Bawrhsap leh District Election Officer ni bawk, Sangchhin Chinzah chuan Assembly inthlanpui hmachhawn tur kan nih angin Press Briefing chu vawi nga (5) tal nei tura beisei an nih thu sawiin, inthlan inbuatsaihna a sawrkar hmalakna te chu mipuite hnena puanzar chu thil \ul tak a nih thu a sawi a. Election Commission of India in Oct. 6-a Assembly inthlanpui neih tur a puan hnuah nimin khan Notification chhuahin inthlanna chuh tumte tan pawh hming pekluhna hun hawn nghal a nih thu a sawi a. Inthlanna buaipuite chuan inthlanna felfai leh thianghlim neih a nih theih nan nasa taka \an an lak thu sawiin, khawilai emaw-a thuthang awm te chu finfiah zel tur leh finfiahna tello chuan puangzar lo hram turin Media te chu a ngen a. Hetiang thuthang hi mipui ti chi-ai thei a nih avangin mipuite pawhin finfiahna an nei a nih loh chuan thehdarh lo se a duh thu sawiin, Media ten sawrkar inbuatsaihna leh hriatfiah duh an nei a nih chuan engtiklai pawha zawhfiah theih reng an nih thu a sawi bawk.

Nimin-a thuthar thehdarhtute an kawmna hunah hian Serchhip SP, R. Sathiyasundaram pawhin boruak muanawm tak hnuaiah inthlanna neih a nih theih nan venhimna hna thawh mek a nih thu sawiin, inthlanna kaihhnawihah sum, Zu, ruihtheih thil leh thildang te Dan lova hman a nih lohna turin theihtawp chhuaha hma an lak thu leh District chhungah hetiang thil lakluh a awm leh awmloh enfiahin lirthei vakvel te pawh an dap \hin thu a sawi a, heng atan hian Check-post te pawh siamin mipuite pawhin lo hrethiam hram hram se an duh thu a sawi a. He inthlanna neih turah hian Central Armed Police Force bakah State Police 350 hman an nih dawn thu sawiin, tunah hian Police \hahnem tak chu an rawn thlen tawh thu leh Flag March pawh \um hnih neih a nih tawh thu a sawi a. Hun kaltawh thlirin Serchhip District chhungah inthlanna muanawm leh felfai tak neih a nih \hin thu sawiin, tunah pawh hian mipuite nena thawhhona \ha tak neiin inthlanna muanawm leh felfai tak neih leh ngei an inbeisei thu a sawi bawk.

He hunah hian thuthar thehdarhtute zawhna chhangin District thuneitute chuan Election dawn avanga Silai tun tura tih ah District chhunga Silai Lisence nei zinga zaa 98 velin tungin uluk takin Police ten an enkawl mek thu an sawi a, tun thlengin Serchhip District chhunga Model Code of Conduct (MCC) bawhchhiatna ala awm loh thu leh Motor zingah Public Transport-ah Party Flag tar phalloh a nih laiin bawhchhia erawh an tam thu an sawi.

Kumin inthlanpui ah hian District chhunga Vote nei ten Vote an thlak vek theih nan nasa taka hma lak a nih thu pawh thuneitute chuan sawiin, pianphunga rualbanlo (PwD) zinga vote nei Serchhip District-ah 291 an awm thu leh heng zinga 50 te chu mahni a kal theilo an nih thu pawh sawiin, heng te hi inthlan Ni ah MPF ten Vote thlak tura an hruai dawn thu leh damlo leh engemaw harsatna neih avanga mahni a kal theilo te pawh Party ten buaipui a remloh thu leh MPF ten an buaipui dawn thu an sawi a. PwD zinga Vote thlak tura hruai te chu Polling Station an thlen veleh Vote thlak nghal tir tur an nih thu an sawi. Hei bakah hian inthlanna a Motor hman tur mamawh khawp kan District chhungah a awm thu pawh sawiin, lirthei chungchang ah hian harsatna kan tawhloh thu an sawi bawk.

Nimin a he inkawmna ah hian Serchhip DIPRO, K. Saitluanga leh Police hotu dangte pawh an tel bawk a ni.