Mizoram Assembly inthlanpui a duty turte Vawiin a\angin an chhuak \an dawn ta

Mizoram Legislative Assembly inthlanpui neih tura inbuatsaihna chuan a vawrtawp a thleng chho \an mek a, he inthlanna neih turah hian bial 40-ah vote nei thei mi 7,70,395 awmin he inthlanna a duty tur Polling Party \henkhat chuan Vawiin hian an duty-na tur hmun an pan ang.

Mizoram Assembly inthlanna naktip mai-a neih turah hian Vote nei thei mi 7,70,395 an awm dawn a, heng zinga 3,75,498 te chu mipa niin a bak 3,94,897 te chu hmeichhia an ni a, mipa aia hmeichhe tamna hi 19,399 a tling a ni. Kumin January ni 1-a kumtling chin laa Mizoram Electoral Roll ennawnna kumin September ni 27-a zawhfel takah khan Mizorama vote nei awm zawng zawng chu 7,68,181 an ni a, hemi hnu hian Tripura Bru Camp-a awmte telin Electoral Roll ennawnna hi neih zui chhoh zel a ni a, kumin September ni 27-a Electoral Roll chhut chhuah tak a\anga a pun belhna hi a vaiin 2,214 a tling a ni. Heng mite vote thlak nan hian Polling Station pangngai 1,164 siam a nih bakah Tripura Bru Camp-a miten Kanhmun-a vote an thlak theihna turin Polling Station lailawk 15 siam a ni a, heng zinga pakua te chu Mamit District amite tan a ni a, a bak pathum ve ve Kolasib leh Lunglei District-a mite tan a ni. Bru Camp-a awm, Kanhmun Temporary Polling Station-a vote thlak tur te hi an awmna District \heuha Polling Party ten an buaipui dawn a, an vote thlakna hmunah hian venhimna lam \ha taka siam a ni ang.

Election Department hotute sawi danin he inthlanna a duty turte chuan vawiin hian an duty-na tur hmun an pan \an dawn a, Vawiin a Polling Party chhuak tur te zingah hian Aizawl District huamchhunga Tuivawl bial leh Chalfilh bial Polling Station \henkhat a duty turte, Mamit District-a Polling Station 4, Lunglei District-a khaw hla zual, Lawngtlai District leh Siaha District-a khaw hla leh kal harsa zualte a tel a, Vawiin hian Polling Party 206 an chhuak ang a, a bak Polling Party 962 te chu naktuk, Thawhlehni-ah an chhuak dawn a. Hengte hi Aizawl khawpui chhung leh District Hqrs. khawpui hrang hrang leh hmun hnai deuha Polling Station te a huam dawn a ni.

Aizawl District bikah chuan Assembly bial 14-a vote nei mi 2,89,456 te vote thlakna turin Polling Station 328 siam a ni a, heng zinga 10 chu Polling Station ven uluk ngai zual, Critical Polling Station a ni. Mamit District-ah chuan bial 3-a vote nei mi 65,531 tan Polling Station pangngai 116 bakah Tripura Bru Camp-a awm te vote thlakna tur Polling Station 9, Kanhmun-ah siam belh a ni a, Polling Station ven uluk ngai zual 4 a awm a, heng bakah hian Kanhmun-a Temporary Polling Station 9 te pawh ven uluk ngai zual zingah telh a ni.

Kolasib District-ah chuan Assembly bial 3-a vote nei mi 57,551 te vote thlakna turin Polling Station pangngai 81 a awm a, heng bakah hian Mamit District-a Kanhmun-ah Temporary Polling Station 3 an nei bawk. Champhai District-ah chuan Assembly bial 5-a vote nei mi 84,705 tan Polling Station 137 siam a ni a, heng zingah hian Lungtan Polling Station chu ven uluk ngai zual zingah a tel bawk.

Serchhip District bial pathum ah vote nei mi 48,980 tan vote thlakna tur Polling Station 77 siam a ni a, heng Polling Station-a duty tur nawlpui chu naktuk ah an chhuak ang. Lung-lei District-a Assembly bial 7 vote nei mi 1,05,075 te vote thlak nan Polling Station 185 siam a ni bawk a, heng zinga 7 te chu ven uluk ngai zual zinga tel an ni a. Lawngtlai District-ah pawh Assembly bial pathuma vote nei mi 80,221 te vote thlakna turin Polling Station 161 siam a ni a, an zinga 8 chu ven uluk ngai zual an ni.

Siaha District-ah pawh Assembly bial pahniha vote nei mi 38,876 tan Polling Station 79 siam a ni a, heng zinga pahnihte chu ven uluk ngai zual an ni bawk.