FMGE&W leh MCSA ten Mizoram CEO laka an lungawilohna thu an auchhuahpui

Mizorama Sawrkar hnathawk zawng zawng intelkhawm, Federation of Mizoram Govern-ment Employees & Workers (FMGE&W) chuan Chief Election Commisioner hnenah na taka lehkha thawnin, inthlanna buaipui tura Mizoram sawrkar hnathawkte a ringtawk lo anih chuan state pawn lam a\anga inthlan buaipuitu tur thawnluh dan ngaihtuah turin an ti a, November ni 11 hmaa Mizoram CEO nilai Shashank-a sawn chhuah a nih loh chuan Election Commission thawhpui an tum loh thu an thlen.
FMGE&W hian Chief Election Commissioner hnena an lehkha thawnah Mizoram Principal Home Secretary Election Commission thupeka sawn a nih chhan chu Chief Electoral Officer, SB Shashank-a’n thu diklo hmanga a hek vang a ni tih an sawi a, Principal Home Secretary mawhphurhna hlihsak mai pawh ni lo, Mizoram pawna sawnchhuah hial a ni chu Election Commission in a thuneihna a hmangsual a ni tih sawiin, sawrkar hnathawk dangte tan pawh inthlanna buaipui chu a him lo hle dawn a ni, an ti a, Mizoram ang, state ralmuanga silai keng sipai, Central Armed Police Force tam tak chahluh tuma hmalakna pawh an hriatthiam loh thu sawiin, Election Commission chuan Mizoram sawrkara dan leh thupek kengkawhtute a ringzo lo tih a lantir a, ECI Manual-in a tarlan anga State sawrkar Home Dept nena ennawn leh an phut thu an sawi.
FMGE&W chuan Election Commission leh Chief Electoral Officer te hmalak dan chu Mizoram sawrkar hnathawkte rin zawhlohna nia an ngaih thu sawiin, inthlanna buaipuitu tur Official zawng zawngte pawh state pawn lam a\anga thawnluh dan ngaihtuah mai turin Chief Election Commissioner chu an duh tih an sawi a, November ni 11 ralhmaa CEO nilai, SB. Shashank chu sawnchhuah anih loh chuan inthlanna buaipui kawngah Election Commission thawhpui an tum loh thu leh Election Commission chu kum 2014-a a lo intiam tawh, Tripura-a awm Bru ten Mizoram chhungah ngei vote an thlak tawh ang tih chu ti hlawhtling tura an phut thu an sawi.
Hetihlai hian Mizoram Civil Service Association chuan CEO, SB. Shashank sawn chhuak nghal tur leh Tuikuk te an Camp-a vote thlak tir tawh lo tura a thutiam kengkawh turin Election Commission an phut tih sawiin, ECI hmalak dan chuan a ti lungni lo hle tih an sawi a. Inthlanna kaihhnawiha venhim hna thawh dan tur ruahmanna ECI in a duan, Manual on Forece Deployment Chapter 6, Para 3(i) kalhin CEO, SB. Shashank chuan a tih tur chin piah lamah hma a la a ni, an ti a. Kum 2014-a Election Commission in Tripura Camp-a awm Bru te an Camp-a vote thlak tir tawh lo tur leh Mizoram chhunga vote an thlak theih dan tur ruahmanna siam a lo intiam tawhna chu kengtlang turin an phut bawk a. Mizoram NGO Coordination Committee leh Mizo mipuite lamah an \ang tlat tih an thuchhuah siamah an an tarlang bawk.

Popular posts from this blog

PAN CARD an tih teh fo hi - Laldinpuia