EVM leh VVPAT te Strong Room-ah dah kim niin Mizoram pumah vote 80.13% a tla phak

Mizoram Legislative Assembly inthlanna atana niminpiah a vote thlakna Electronic Voting Machine leh VVPAT te chu nimin chawhnu khan District Hqrs. hrang hrangah dawn kim a ni a. Zawhna chhangin Chief Electoral Officer,Ashish Kundra chuan tun dinhmuna vote tla zat hi chawhrualin za zela 80.13 a tling tih a sawi.

Niminpiah a Mizoram Assembly inthlanpui neia hman Vote thlakna EVM leh VVPAT dawn kim hnuhnun berna Lunglei District-ah chuan Kanhmun-a Bru te vote thlakna tura Temporary Polling Station siama vote thlakna EVM leh VVPAT te chu nimin chawhnu dar 2:25 khan hmuh let a ni a. Vote thlakna atana hman EVM leh VVPAT te hi District Hqrs. hrang hranga Strong Room-ah dahluh fel vek a ni tawh a, tumahin an khawih chingpen loh nan Central Armed Police Force leh Mizoram Police ten chhun leh zan zawmin an ven thuah a, hetiang hian vote chhiar hun tura ruat, December ni 11 thleng \ha takin an veng dawn a ni.

Tripura Bru Relief Camp-a Mizoram mi awmte vote thlak tirna Kanhmuna Temporary Polling Station 15 siamah vote thlak hun tura ruat niminpiah zing dar 7:00 a\anga tlai dar 3:00 thlenga vote thlak zo hman lo, Polling Area-a lut tawh te chu vote thlak zui tir an ni a, heng mite bakah hian vote thlak tuma lo kal, hun ral hmaa Polling Area thleng hman lo mi engemawzat an awm avangin Polling Area thleng hman chin te chu CAPF ten \ha takin an veng a, Langkaih Group YMA hruaitute hnen a\anga thudawn danin CAPF duty te thil tih dan hi YMA hruaitute pawhin \ha takin an thlithlai renga, hun tiam ral hnua lut ru an awm lo niin an sawi a ni a. Kanhmun Temporary Polling Station-a vote thlak hi nizan hmasa dar 8:15 vel khan zawhfel niin Tripura Bru Camp 6-a Mizoram mi vote nei zat hi 11,967 an ni a, heng zinga za zela 53 velin tlai dar 4:00 thleng khan vote an thlak hman a, a kimchang erawh chu chhut chhuah a la ni rih lo a ni.

Kanhmun Temporary Polling Station-ah hian Assembly bial pakua, Hachhek, Dampa, Mamit, Tuirial, Kolasib, Serlui, Lunglei, Thorang leh West Tuipui bial Electoral Roll-a hming chuang Bru ten vote an thlak a. Niminpiah tlai dar 4:00 thlenga vote thlak zat hi vote nei mi 5052 awmna Hachhek bialah chuan 2,643 a tling tawh a, hei hi zaa 52.31 a tling phak a, Tuikuk vote nei mi 972 awmna Dampa bialah chuan 460-in vote an thlak a, hei hi zaa 47.32 a tling a, Tuikuk vote nei 3,125 awmna Mamit bialah chuan mi 1,544 ten vote an thlak hman a, hei hi zaa 49.40 a tling a ni.

Tuikuk vote nei 659 awmna Tuirial bialah chuan mi 347-in niminpiah tlai dar 4:00 thleng khan vote an thlak hman a, hei hi zaa 52.65 a tling a, vote nei mi 458 awmna Kolasib bialah chuan mi 248-in thlak hman a, hei hi zaa 54.14 a ni a, Serlui biala Tuikuk vote nei 823 zinga 467-in vote thlakin za zela 43.37 a ni a, Lunglei South biala vote nei 56 te zingah 23-in vote an thlak a, hei hi za zela 41 a tling a, Thorang biala Tuikuk vote nei 343 zinga 217 ten vote thlakin hei hi za zela 63.26 a tling a, West Tuipui biala vote nei 526 zinga 323 ten vote thlakin za zela 61.40 a tling bawk.

Niminpiah a vote nei mi 7,70,395 ten vote an thlak zawh takah hian candidate 209 te hmakhua tur chu rel fel a ni ta a. Inthlannaah hian rampum huap political party pathum, Tual\o party pathum leh tual\o party inziaklut lo pahnih te’n an chuh a, Independent hrim hrim 2 an awm bawk. Rorellai Congress leh eptu party lian ber MNF chuan bial 40 an chuh kim ve ve a, BJP-in bial 39 chuhin ZPM chuan bial 38 an chuh a. PRISM leh Zoramthar bakah NCP leh NPP chuan candidate an nei ve bawk. Candidate zingah hian hmeichhia 15 an awm a, BJP in ngaih berin 6 an nei a, Zoramthar-in 5 neiin an dawt a, MNF, PRISM leh NPP chuan hmei-chhe candidate an nei lo thung.