Ajasorra Polling Station-ah Vote thlak leh dawn; Mizoram pumah EVM leh VVPAT thalo tam

Lawngtlai District Tuichawng Constituency-a Ajasora Polling Station-ah Assembly inthlanpui neih zawh taka inthlanna hmanrua a \hat loh avangin Vawiin mipuiin vote an thlak \ha dawn.
Election Department hotute sawi danin, Ajasorra Polling Station-ah hian vote nei mi 1080 an awm a, niminpiah zing dar 7:00-a vote thlak theih hun hawn a nih hnuah mi 52-in vote an thlak hman tihin vote thlakna khawl a chhia a, hei hi a thara thlak a nih chuan chawhnu dar 2:00 vel a ni hman a. Hemi hnu hian mipuiten vote thlak chhunzawm leh nghal mah se, vote thlak hun tawp tlai dar 4:00-a mipuiten vote an thlak zo hman lova, vote thlak hun hi pawhsei niin, nizan hmasa dar 12:30 thleng khan mipuiten vote an thlak a, vote thlakna khawl EVM leh VVPAT chu ni khat chhung nung thei tura set a nih avangin zanlai dar 12:30-ah hian vote thlakna khawl hi a thi a, tihngaihna dang a awm tak awm loh avangin mi 300 chuangin vote an thlak hman lova, hemi chungchang hi Election Observer chuan Electio Department-ah a thlen a, he Polling Station-ah hian vote thlak \hat a nih theih nan Election Departent chuan Election Commission of India-ah thlen a ni a, Election Commission of India ruahmanna in Vawiin ah Ajasora Polling Station bikah hian Vote thlak \hat a ni dawn a. Nimin chawhnu khan inthlan buaipui turten Lawngtlai chhuahsanin Ajasora hi an pan a. Ajasora hi Lawngtlai a\anga KM 150-a hla a ni a; Voter mipa 543 leh hmeichhia 537, an vaiin 1080 a awm a ni.
Mizoram Assemby inthlanpui vote thlakah khan vote thlakna khawl EVM leh VVPAT \ha lo a awm nual a, hengte hi a thara thlak a nih hnuah tluang taka vote thlak chhunzawm a ni tih Election Department hotute chuan an sawi a. Election Department chhinchhiah danin Mizoram pumah vote thlakna khawl Balloting Unit leh Control Unit chhia 46 awmin, Balloting Unit chhe zat chu Mizoram puma hman zawng zawng a\anga zaa 2.47 a ni a, Control Unit chu Balloting Unit hman tlem a nih zawk avangin a chhe zat hi zaa 2.5 a tling a, VVPAT chhia 101 awmin, hei hi VVPAT hman zat a\anga zaa 5.5 a tling a ni.
VVPAT chhia a tam chhan zawhna chhangin Election Department hotute chuan, VVPAT hi Thermal Machine a nih avangin nizung (Direct Sunlight) nen inhmu lo tur a ni a, hei hi Training-na ah pawh Presiding Officer leh Polling Officer-te chiang taka hrilh niin, mi \henkhat thil hrefuh tawk lo an awm avangin ni chhun theiha VVPAT dah an lo awm nual a, heng khawlte hi hman theih lohva a awm zui hlawm avangin VVPAT chhia hi a tam phah nia hriat a ni a. Hetiang harsatna tawkte hi VVPAT dahna hmun sawn a nih hnuah tluang taka vote thlak chhunzawm a ni leh vek niin Election Department hotute chuan an sawi a. VVPAT saimtu ECIL Company Engineer-te pawhte pawh tunah hian Mizorama an awm thu leh an ni pawhin thil awmdan an ngaihchan reng thu an sawi a ni.

Popular posts from this blog

PAN CARD an tih teh fo hi - Laldinpuia