Latest News

Election Commission in Mizoram CEO atan Ashish Kundra, IAS a rawn ruat thar ta

Election Commission of India chuan Mizoram-a tlawmngai pawlte duhloh Chief Electoral Officer (CEO), SB. Shashank chu la chhuakin a aiah Mizoram sawrkar-a Higher and Technical Education changtu Secretary, Ashish Kundra chu CEO thar atan nimin khan a rawn ruat ta.

Mizoram-a Chief Electoral Officer (CEO) tura ruat, Ashish Kundra hian he hna chelh tura ruat a nih hnu nimin vek khan Aizawl-a CEO Office chu tlawh nghalin inthlanna atana inbuatsaihna kal mek te a enpui nghal a, Vawiin hian dan pangngai in a hna thar hi a zawm nghal dawn a ni.
Mizoram a\anga SB. Shashank ûm chhuak tura tha thawhtu NGO Coordination Chairman, Vanlalruata chuan SB. Shashank chu Mizo hnam tana pawi thei thil tih tumah puhin, ani thlak a ni ta chu an lawm thu a sawi a. SB. Shashank a nih loh phawt chuan Officer dang tu pawh an pawm theih thu sawiin, CEO thar chu Mizoram-a inthlanna thianghlim, felfai leh muanawm a awm theihna atan thlâwp an inpeih reng thu a sawi bawk.
Rorellai Mizoram Pradesh Congress Committee (MPCC) thupuangtu, Lallianchhunga chuan tlawmngai pawlte duhloh CEO a chhuak ta chu an lawm thu a sawi a. Chutih lai erawh chuan state sawrkar leh an party chuan CEO atan hian Mizo ngei awm se an duh thu leh Mizo IAS Officer 3 hming chu Election Commission hnenah theh thlak a nih thu a sawi a. Mizo ngei an duh chungin SB. Shashank a chhuak hrim hrim chu an lawm thu a sawi bawk. MNF hruaitu, Zosangliana chuan CEO thar ruat a nih avangin Election Commission chungah lawmthu an sawi a, Mizoram mipui duh dan anga SB. Shashank a chhuak ta chu lawmawm an tih thu a sawi a. CEO ruat chu Election Commission thu a nih avangin an ruat apiang chu ram leh hnam tana pawi tur zawnga thil a tih loh chuan an pawm thei tih a sawi bawk.
Tarlan tawh \hin angin Tripura Relief Camp-a Bru vote neite Tripura a vote thlaktir tuma an puh avang leh venhimna kalpui danah hnam bil tana engemaw taka tih tuma ringhlelin NGO Coordination Committee chuan SB. Shashank chu a chhuah ngiatin November ni 6 a\ang khan a pisa kai tur an dang \an a. A tukah Election Commission-in Delhi-a an koh thlak avangin a pisa kai tur dan hi tihtawp a ni.
Election Commission chuan thil awmdan rawn thlithlai turin ECI Team chu Mizoram-ah vawi hnih a rawn tir a, Team lo kal hnuhnung zawk Deputy Election Commissioner, Sudeep Jain kaihhruai chuan CEO thar tur hming rawtna siam turin Mizoram sawrkar a hriattir a. Mizoram sawrkar chuan Mizo IAS Officer 3 – Lalhmingthanga, H. Lalengmawia leh K. Lalthawmmawia te hming a pe thla a, mahse ECI chuan hming pahnih dang thehthla leh tura an tih angin pek thlak leh a ni a, chumi hnuah Ashish Kundra hi ruat a ni ta a ni.

Comments

Popular News (Last 30 Days)