CEO chhuak tura phutin naktuk-ah YMA duty tum

Mizoram-a NGO Co-Ordination Committee in Mizoram Chief Electoral Officer (CEO), SB. Shashank chhuak tura an phutna kal zelah an huntiam Vawiin tlai dar 5:00 hmaa Mizoram a chhuahsan lo a nih chuan naktuk (Thawhlehni) zing dar 8:00 a\angin Central YMA chuan Aizawl-a Election Office kai tur dang turin an rel.
Mizoram Chief Electoral Officer, SB. Shashank-a’n Home Department-a Principal Secretary, Lalnunmawia Chuango chunga hma a lakna duhlohna chungchanga hmalakna kal zelah Inrinni zan khan Central YMA chuan Aizawl khawpui chhunga YMA Branch hrang hrang inhmuhkhawm kovin hmalak dan tur an rel a.
He Meeting hian Zirtawpni tlai-a NGO Co-Ordination Committee in Mizoram CEO chu inthlan buatsaih a tum danah inthlanna him leh muanawm, zalen leh felfai tak neih a duh laia, he lam hawi hian a kalpui lo nia an hmuh avanga inthlan kaihhnawih buaipui zel tlakah an ngaih loh thu leh November 5, 2018 ni tlak hma ngeiin a hna chhunzawm tawh lova, lo inthiarfihlim tur leh Mizoram chhuahsan tura an ngenna chu sawiho a ni a. He \hutkhawm a tel te hian SB Shashank, CEO ni mek hian Vawiin November ni 5 (Thawh\anni) tlai dar 5:00 thlenga Mizoram a chhuahsan loh chuan naktuk, Thawhlehni zing dar 8:00 a\angin Election Office kai tur dang turin Mizo zawng zawng thawh chhuah tur a ni tiin a rel a. A chhuah hma chuan Branch duty detailment siama duty zui zel tura tih a ni bawk.
Hetianga NGO Co-Ordination Committee lam ten hma an lak tak avang hian nimin tlai khan Chief Secretary hovin Mizoram sawrkar hotu pawimawh te chu Aizawl-ah an \hukhawm nghal nia thudawn a ni a. Vawiin hian CEO hian thuthar thehdarhtute kawmin Chief Secretary pawhin chawhma dar 11:00 hian NGO Co-Ordination Committee hruaitute chu a kawm dawn bawkah chawhnu lamah Mizoram Kohhran Hruaitute Committee (MKHC) hruaitute a kawm bawk ang.
Thudawn danin Mizoram CEO hian Mizoram sawrkar-a Home Department Principal Secretary, Lalnunmawia Chuaungo hi Tripura Relief Camp-a Electoral Roll Revision chungchanga inrawlh ah leh inthlan awm tura Central Armed Police Force chahluh an tum dodalah puhin sawnchhuak turin ECI a ngen a. Election Department chuan Tripura Relief Camp-a Bru awm, Mizoram khua leh tui dik tak an chhinchhiahte chu Electoral Roll-a thun an duh a, mahse, hei hi Mizoram sawrkar chuan remti lovin, hruaikîr hna thawhna atan chauha hman turin a ti a. Hemi chungchangah hian CEO, SB. Shashank chuan Home Secretary, Lalnunmawia Chuaungo chu a mawhphurtu ah a puh bawk a ni.

Popular posts from this blog

PAN CARD an tih teh fo hi - Laldinpuia