Latest News

Bru chungchanga HC-a PIL thehluh avangin inthlan hun sawn a nih a rinloh thu CEO in a sawi

Mizoram Chief Electoral Officer, Ashish Kundra, IAS chuan nimin tlai khan Aizawl-ah thuthar theh-darhtute kawmin Tripura Relief Camp-a awm mek ten Vote an thlakna tura ruahmanna an siam te a hrilhfiah a. Bru chungchang ah High Court-a PIL thehluh a nih avangin inthlan hun sawn a nih a rin loh thu a sawi bawk.

Nimin tlai-a State Media Centre, Aizawl-a thuthar thehdarhtute a kawmna hunah hian Mizoram Chief Electoral Officer, Ashish Kundra chuan Election Commission of India duhdanin Bru (Reang) voter Tripur Transit Camp a awm ten vote an thlak theih nan Kanhmun, Mamit District ah an vote thlakna tur bik Special Polling Station 15 siam a ni dawn tih sawiin, November ni 20 khan amah ngeiin a hmunah inbuatsaihna kal mekte a thlithlai thu leh Kanhmun YMA leh mipuiten sawrkar hmalakna an thlawp \hat dan a hmuh chuan a tilawm hle tih a sawi a. Mizoram CEO chuan Tripura lam pawh tlawhin Bru Camp awmna te, an State officials te pawh a kawm thu leh Tripura CEO nen pawh an inbiakpawh reng thu a sawi a. Tripura Relief Camp-a awm mek te an awmna Camp a\anga Kanhmun rawn phurh thlen dan tur motor leh thildangte tunah hian enfiahna (assessment) tih mek a nih thu sawiin CEO chuan, a \ul ang zelin sawrkar chuan hmalak a inhuam thu a sawi a. ECI-in November ni 23 hmain Bru Elector Tripura Camp-a awm mekte chuan Photo Voter Slip an nei tur a ni a tih angin Vawiin leh naktuk (ni 2) chhungin tihfel vek a nih beisei a ni a ti a; he Slip-ah hian vote an thlakna tur Special Polling Station chiang takin a chuang dawn tih a sawi bawk.
Candidate zinga Criminal Case nei tawh \hin leh nei mekte chuan Mizorama chanchinbu darhzau ni lo, a tenau zawkah chauh an chhuah nia an sawi chungchanga an zawhna chhangin CEO chuan a \ul chuan Election lamin ECI Guidelines-in a phut ang ngeia zawm turin hriattir an ni leh vek ang, a ti a. High Court-ah Bru chungchanga PIL thehluh a nih vangin inthlan ni (election date) tihdanglam a nih a rin loh thu a sawi bawk.
Mizoram CEO chuan niminpiah ah ZPM-in a hnena MNF pamphlet chungchanga complaint an thehluh pawh bawhzuiin MNF Party te chu ‘showcause notice’ pek an ni tih a sawi a, chumi chhanna leh an insawifiahna chu MNF lamin nimin chawhnu khan a hnenah an thehlut veleh tawh thu a sawi a; CEO chuan an chhanna lehkha rawn thehluhte uluk taka zirchian a nih hnuah Dan angin hmalak a nih tur thu a sawi bawk.
Tunhnaia Jt. CEO transfer a nih thuah engmah buaina dang awm vang ni lovin state sawrkar inrelbawlna kal zel chauh a nih thu leh, Addl CEO 2 lai an awm mai bakah tun dinhmunah chuan inthlanna kaihhnawih thil leh inbuatsaihna a zo thawhkhat tawh a, RO-te kutah engkim mawh-phurhna tam zawk a awm tawh avangin sawrkar chuan Jt. CEO chu post tharah a sawnchhuak ta a ni, a ti bawk.
Mizoram CEO chuan Tripura Transit Camp-a Vote nei zinga Mamit District te tan YMA Playground, Kanhmun-ah leh Kolasib leh Lunglei District tan Badminton Indoor Stadium, Field Veng-ah Special Polling Station hi siam a nih tur thu pawh sawiin, heng Special Polling Station pakhatah hian Elector 1200 aia tam awm theih a ni lovang tih a sawi a. Transit Camp-a Bru awmte hnenah hian mi pakhat tan Special Polling Station pakhat zela vote thlak tura ruahman a ni ang a, mi pakhatin Special Polling Station pakhat aia tamah vote a thlak thei lovang tih a sawi bawk.
Heng Special Polling Station-ah hian EVM leh VVPAT hmanga Vote thlak a nih tur thu pawh sawiin CEO chuan, Polling official leh buaipuitu tur zawng zawngte hi an awmna district a\ang \heuha thlanchhuah tur a nih thu a sawi a. Heng inthlanna kalpui dan te hi Deputy Secretary aia hniamlo Nodal Officer in a enpi dawn thu pawh a sawi bawk.

Comments

Popular News (Last 30 Days)