Tuirial Airfield-ah ni thum chhung awh tur Winter Festival hman a ni leh dawn

Mizoram sawrkar Tourism Department bultumin kumin December ni 13 a\anga 15 chhung hian Tuirial Airfield-ah Winter Festival neih a ni leh dawn a. He Winter Festival hman dan tur relin nimin khan Organising Committee Member te chu Tourism Secretary, Esther Lalruatkimi hovin a Pisa-ah an \hukhawm.
Kumin Winter Festival hi Krismas lamhawia hman tum a ni a. State pawn a\anga khualzin mi a tam thei ang ber hipkhawm an nih theih nan a tihlar (publicize) lam kawngah pawh kumdang aia uar zawka hmalak tum a ni a. Zai leh lam ngaithlak leh thlir tur a awm dawn a, mipui a duh apiang tel theihna tur Mizo hnam infiamna hrang hrang ‘Mizo Indigenous Games’ neih a ni dawn bawk a. Thal inkahsiak, Photo Booth, Food Stall, Powered hang Glider, Rifle inkahsiak, Hot Air Baloon leh Adventure activities hrang hrang a awm ang a. Carnival a awm dawn bakah Handloom & Handicraft Exhibition te pawh neih tum a ni.
Winter Festival Organising Committee hian Winter Festival hman dan tur chipchiara rel tur hian Tourism Director kaihhruaina hnuaiah Programme Committee a din nghal a. He Committee hian item hrang hrang neih dan tur leh nei tu tur te, ruahmanna \ul ang apiang an lo duang leh dawn a ni.

Popular posts from this blog

PAN CARD an tih teh fo hi - Laldinpuia