SEDAL kan la kal zel e

SEDAL kan la kal zel e

- Laldinpuia, Secretary

Serchhip District Academy of Letters

Mi tam takin, “SEDAL te hi tunhmain in hmalakna a \hat tehreng nen, tunlai hian in reh ta hle mai, in pawl hi in awm tawhlo em ni?” tiin zawhna min zawtfo \hin a, a lehlamah a lawmawm viau laiin a lehlamah chuan zawhna chhan harsa tak leh thil dik tak a ni lawi si. Hetianga zawhna min zawttute leh SEDAL lo ngaihven \hin zawng zawng te hnena kan chhanna chu, “SEDAL hi kan la kal zel e,” tih hi a ni. Serchhip District Academy of Letters (SEDAL) hi kum 2003-a din kha a ni a, tunhma ang khan chak vut vut lemlo mah ila tun thleng hian kan la kal zel a, hma kan sawn zel dawn bawk tih hi kan sawi duh a ni.

Kan harsatna :

Ni e, zep thu a cheng lo, SEDAL ten harsatna lian tak kan hmachhawn a, chumi avang chuan kan pawl pawh nasa takin a nghawng a, tunhnai chho ah kan senior thu thiam leh mi taima ten mual min liamsan zel a, ni 13.1.2014-ah kan SEDAL hnukpui leh a phur ber te zing ami Pu VL. Ruala’n min boral san a, ni 3.7.2016-ah kan Vice President Pu KL. Chhuanvawra a boral ve leh bawk a. Ni 23.3.2016 khan kan thu leh hla thiam leh SEDAL bul\antu te zing ami Pu Lungduhsanga chuan rinloh takin min boralsan veleh thut mai bawk a. Hetianga kan thu leh hla thiam leh SEDAL khaidingtu tena mual min liamsan tak zelah chuan \hangthar zawkte rilru a hnual lo thei lova, thu leh hla neih a har a, programme nei tura han vahchhuah pawh kan tha a tho meuh ta lo a ni.

Hetihlai hian kum 2017 chhung zawng khan kan President Pu Lalhmangaiha Chawngthu in a nupui damlohna avangin Mumbai lamah min awmsan leh ta bawk si a. Hetih chhung hian SEDAL ten hmalakna kan nei hleithei ta lo a ni. Kan President Pu Hmangaiha phei hi chu Mumbai a\anga a lo haw hlimin min rawn phone a, “SEDAL President kha ka la ni em kha?” tiin min rawn zawt hial! Chutiang vel chu kan nih avangin kan pawl a kal hleithei lova, kan hruaitu hlun te harsatna tawh chuan nasa takin SEDAL min nghawng a ni.

Beiseina thar nen intuaitharna :

Hetianga hun rei tak kan ngawih hnu hian kum 2017 kumtawp lam a\ang khan hma thar lak tumin hruaitu te kan han inthlang \ha leh a, kan Vice President boral ta hmunruak luahkhat turin mi thar te kan han ruat a. Tin, Membership drive neih a \ha niin kan member ni sa te chu Membership Fee te kan han khawn a, member ni ngailo te pawh a theih chen chenah member ni turin kan han sawm hlawm bawk a. Chutiang chuan hma la in kan intuaithar a, hma kan sawn ve zel bawk a ni.

Lehkhabu Project :

SEDAL te hian kan hmalakna bul ber chu lehkhabu chhuah hi a ni a, lehkhabu hi kan tichhuak nual tawh a, Serkhawpui Robawm, Mizo Robawm, Pipu Sulhnu leh hmun hmingthang te, SEDAL Robawm tih te kan tichhuak tawh a. Tunah hian lehkhabu dang tichhuah leh tumin hma kan la mek a, kan lehkhabu tihchhuah thar tur chu a hmingin ‘SEDAL Robawm-II’ a ni ang. Hemi atan hian tunah editing khawih mek a ni.

|hangthar te kan sawm e :

SEDAL hi kan la thi lova, tun thlengin kan la kal zel a, kan kal zel dawn bawk a ni. Kan mi hmasa te leh kan hruaitu hlui te boral zel mah se \hangthar te chakna ringin kan hruaitu hlui ten a an thu min hlanchhawn te hrereng chungin hma kan la chho zel ang. Chu kan hmalakna min \awiawm tur chuan \hangthar lehkhathiam leh thu leh hla thiam zawk te kan sawm tak meuh che u a ni. Thu leh hla tihhmasawnna kawnga tha leh zung kan senna ah min telpui a thurawn min pe tur leh kan zinga tui taka lo tel zel turin thu leh hla lama tui mi zawng zawng te kan sawm a che u.

Tunah hian SEDAL member ni duh tan pawh kawng a inhawng reng a, Membership Fee pe in member-ah a inziahluh mai theih a ni. SEDAL member ni duh te chuan SEDAL hruaitute hnenah englai pawhin inhriattir theih reng a ni.

Kan Mizo thu leh hla tih hmasawn zel hi kan tum ber a ni a, tunlai \hangtharte ah kan thu leh hla diklo thehdarh a tam tawh em em mai a, hemi siam\ha a \hangthar te hnenah kan Mizo thu leh hla dik thehdarh kawnga hma kan laknaah min telpui theuh turin mi zawng zawng kan sawm e.