Science Fest hmang \an

DIET Serchhip buatsaih ni 2 awh tur Science Fest & Innovation Mela chu nimin khan neih \an a ni a, Vawiin ah chhunzawmin zawhfel a ni ang.
DIET Serchhip in an Campus-a Science Fest & Innovation Mela an buatsaih hi SCERT Dy. Director, A. Lalchhandami chuan khuallian nia hawngin SCERT Directorate hnuaiah Science Fair leh hetiang lam chi Programme buatsaih ni \hin mah se Innovation Mela chu an la buatsaih ngaihloh thu leh DIET Serchhip-a thawktute \hahnem ngaihna avanga tuna hman theih a ni chu lawmawm a tih thu a sawi a. He hun hmang tura kalkhawm zirlaite chu taima taka School an kal a pawimawh ber thu leh chumi hnuah zirlai thiam chu a pawimawh thu hrilhin, tunlai khawvel ah by-heart system a kal ngawt chu a tawk zo tawhlo tih a sawi a. Tunlai khawvel chu intihsiakna nasatna hmun, a thiam leh taima te dinchhuahna a nih thu sawiin, zirlaite tana Field Visit leh Activity buatsaih \hin chu an thiamna tuh nghettu a nih avanga uar deuh deuh a \ul thu a sawi a. Mi hriat aia tam hre tur chuan ngaihtuahna nasa zawk senga huaisen a \ul thu pawh sawiin, taima leh tumruhna nena lehkha zir turin a chah bawk.
DIET Serchhip Principal, Lalrammawia kaihhruai he hunah hian DIET Lecturer a\angin R. Lalrinawma chuan he programme an buatsaih dan a sawi a. He huna tarlan a nih danin Science Fest & Innovation Mela-ah hian DIET-a zirlai ten Experiment chi 30 entirin Zoological Speciment chi hrang hrang an entir a, mi 40 lenna 3D Theatre siamin zirlai helai hmun tlawhtute tan ennawm chhuah a ni bawk a. Serchhip Town-a School 9 ten Science Exhibition buatsaihin hei hi endikna neiin lawmman siam an ni dawn a, hei bakah hian zirlai naupangte intihsiakna turin Mathe-matics Corner leh zirtirtute intihsiakna turin Innovation Mela buatsaih a ni bawk a. Heng an hmun buatsaih te hi Serchhip Town-a zirna In hrang hrangte tan tlawhna hun bik buatsaihin a inchhawkin an tlawh a ni.

Popular posts from this blog

PAN CARD an tih teh fo hi - Laldinpuia