NPP Ticket-a Serchhip bial-a ding turin Serchhip bial-ah hnehna an chan ngei a rin thu a sawi

Nimin khan Kapliana Pachuau, Serchhip Zion Veng, Serchhip Time Chanchinbu-a Editor ni bawk chuan tualchhung thuthar thehdarhtute kawmin National People’s Party (NPP) ten Official Candidate a Serchhip Bial-a ding tura an rawn sawmna chu ngun taka a ngaihtuah hnu ah lawm takin a pawm tih sawiin, Assembly inthlanpui neih turah a tlin ngei a rin thu a sawi.

Nimin a Serchhip Bazar NPP Office-a thuthar thehdarhtute a kawmna ah hian Kapliana Pachuau chuan tunhnaiah NPP te hian Serchhip-ah te lamkal tira an Candidate tura an rawn sawm thu leh alo hnar thu sawiin, amaherawh chu tun thla ni 27 tlai khan Aizawl-ah NPP hruaitute nen inkawmna neiin an hmalak tum dan te an sawiho hnuah Candidate tura an sawmna chu lawm takin a pawm ta tih a sawi a. Serchhip-ah NPP din a la ni lo tih pawh sawiin, Thenzawl leh Buangpui-ah erawh din a ni tawh tih a sawi a, “NPP hian Unit mumal la nei lo mah ila Serchhip mipui ten min vote phawt chuan ka tling thei a ni,” tiin Serchhip Bial tihmasawn duh, NPP tui puitu apiangte chu an Office thar-ah hian lenglut a zawm ve turin a sawm a, Veng hrang hranga NPP Unit din duh te tan pawh zalen taka din an phal thu leh kumin Mizoram inthlanpui zawh hnuah nakum MP inthlan tur atan inpuahchahin, chumi hnuah kum 2023 Mizoram MLA Inthlanpui lo awm tur atan an insangmar chho zui lehnghal dawn tih a sawi bawk.
A sawizelnaah NPP Candidate tur Kapliana Pachuau chuan “Serchhip Bial-ah hian CM nilai te, CM nih tum ho te rawn in Candidate tumin an rawn insehhmur tuau tuau a, mahse Candidate dang ho zawng zawng hi chu MLA Election result puan ruala Serchhip chhuahsana Aizawl a min awmsan zui leh vek turte an ni a, kei chuan Serchhip Bial hi pemsan ka tum lova, ka \hutchilh dawn a ni. Serchhip Bial-a thlantlin ka nih chuan Serchhip te, Thenzawl te, Neihloh leh Buangpui khua ten harsatna an tawhin ka mawhphurna (Responsibility) ah ka ngai dawn a, Serchhip leh Thenzawl ah MLA Office hawngin Neihloh leh Buangpui te pawhin MLA pan lovin MLA in a pan zawk dawn a ni,” a ti bawk.
He hunah hian thuthar thehdarhtute zawhna chhangin Kapliana Pachuau chuan Serchhip-a ZPM dintute zingah a tel thu leh bial viltu ah te pawh hmangin hma a lak thu a sawi a, amah-erawh chu ZPM Chief Ministerial Candidate chu Serchhip-a a rawn din hnuah bialtu MLA dinglai paihthla tur chuan tih tak taka tih ngai nia a hriat laiin ZPM Candidate tur hian tih tak takna a nei si lo nia a hriat avanga ZPM chhuahsan a nih thu a sawi a. Party hrang hrang ten an sawm karah NPP chu a zawm ta tih sawiin, mipuite tana hna thawh chu NPP dinchhan ber a nih thu a sawi bawk.
Tunah hian Buangpui-ah NPP Unit pakhat leh Thenzawl-ah Unit 3 an neih tawh thu pawh sawiin, Serchhip-ah erawh an la neihloh thu a sawi a. MPF te nena thawhhona thuthlung chung-chang zawhna chhangin, NPP chu tunhnai chauha din a nih thu leh MPF te nen thawhhona thuthlung ziak ve lo mah se thuthlung a inziak te chu an palzut dawnloh thu a sawi a. House-to-House campaign te neiin Publicity-ah te \anlak an tum thu sawiin, Assembly inthlanpui neih turah pawh tlin ngei a inrin thu a sawi.
MLA inthlanpui neih tura Candidate te zingah ‘Serchhip tlangval’ chungchang zawhna chhangin, tuna a lan danah Serchhip bial-a ding tur zingah amah chiah ‘Serchhip tlangval’ tih theih an awm nia a hriat thu a sawi bawk.
He hunah hian NPP Thenzawl Block-a hruaitute pawh rawn telin NPP chu September thla khan Thenzawl-ah an din ve nghal thu leh Approval pawh an lak tawh thu an sawi a. Tuna Candidate tur an nei ta chu lawmawm an tih thu sawiin, Thenzawl-ah hian Campaign Office tur pawh an ruahman fel vek tawh thu an sawi a. Thenzawl leh Buangpui-a an Unit te chu a hming mai-a din a nih loh thu sawiin, hruaitute pawh fel taka an inruat vek thu an sawi bawk.

Popular posts from this blog

PAN CARD an tih teh fo hi - Laldinpuia