Thursday, 11 October 2018

Dan lova din CADC Dan anga \hiah phutin Serchhip-ah kawngzawh neih a ni

Dan lova din Chakma Autonomous District Council (CADC) Dan anga \hiah phutin nimin khan Mizoram hmun hrang hrangah kawngzawh neih a ni a. Serchhip-ah pawh Serchhip Sub-Hqrs. YMA huaihawtin Leisekawt Mual a\anga Serchhip Bazar thlengin he kawngzawh hi neih a ni.

Nimin a he kawngzawh ah hian mi 300 chuang zet telin kawngzawhtute chuan Dan lova din Chakma Autonomous District Council \hiah an duh thu te, Chakma Foreigner Mizoram-a la awm mek te chhuak tura an duh thu te, Chakma Autonomous District Council Area chu Mizoram a nih thu leh Mizoram chu Mizote a nih thu te an aupui a, heng bakah hian heng an thilphut tarlanna thuziak chi hrang hrang pawh an kenglang bawk.
He kawngzawh bul\anna Leisekawt Mual-a neih ah Serchhip Sub-Hqrs. YMA Vice President, Lalzuiliana chuan thu sawiin CADC chu kum 1972 April 29-ah India Danpui Sixth Schedule hnuaiah din a nih thu leh dan lo anga din, fu-ke kimlo a din a nih thu a sawi a. Hei vang hian ‘Dan anga \hiah ni rawh se’ tih chu an aupui thu a sawi a. Chakma te hian Mizoram chhunga Square KM 1500 vela zau chu min luah sak mek thu leh tun Financial Year-a an Budget pawh cheng Vbc. 86 chung zet a nih thu a sawi a. Chakma te chuan Mizote chu National Human Rights Commission-ah min hek fo thu leh an Area-ah ram kan neih ve pawh an phal lovin In leh lo bakah Biak In hmun pawh kan neih theihloh thu te sawiin, Chakma te hi Mizoram-ah an pung chak hle a, an nghawng lenna ber CADC chu Dan anga \hiah ni rawh se tih thu an thupui ber a nih thu a sawi bawk.
He kawngzawh puala inkhawm tawi Serchhip AOC Veng-a neih ah Serchhip Sub-Hqrs. YMA Fin. Secretary, Kawl\huama chuan thu tawi sawiin Dan lova din Chakma Autonomous District Council chu Dan anga \hiah theih a ni tih hre thar turin he huna tel te chu a chah a, hemi atan hian Mizo mipuite kan \anrual a \ul thu sawiin, Mizo mipui zawng zawng ten he hmalakna hi kan thlawp a nih chuan kan \hiah ngei theih dawn thu leh Hnam anga kan \anrual a \ul thu a sawi a, he kawngzawh hi Mizoram-a History pawi-mawh bul in\anna nise a duh thu a sawi bawk.
He kawngzawh puala inkhawm pui ber Serchhip Bazar-a neih ah Serchhip Sub-Hqrs. YMA President, R. Sanghmingthanga chuan, “Mizo-ram hi Mizote ta a ni,” tiin Chakma te chu Bangladesh Tlang mi an nih thu leh Bangladesh-ah Provincial Autonomy dilin sawrkar in a bengkhawn duh loh leh ram a pek duhloh an nih thu a sawi a. Hmarchhak State hrang hrangah Chakma tam tak an awm thu sawiin, Mizoram-a ram an nei bik chu thil diklo a nih thu a sawi a. CADC chu Parliament in a pawmpui a nih loha din a nih thu sawiin, Assembly pawhin a pawmloha verther taka din a nih thu a sawi a. “Dan lo anga din khu Autonomous District Council khu Dan angin kan \hiat thei dawn law’m ni?” a ti a. Hetianga hmalakna atan hian Mizo mipui zawng zawng inlungrualna dik-a inlungrual turin a sawm bawk.
Serchhip Sub-Hqrs. YMA President chuan Mizoram chu ram zim te a nih thu leh \hensawm tham a nih loh thu pawh sawiin, hetianga ram zim-ah Chakma ten anmahni puala ram an nei chu lungchhiatthlak a tih thu a sawi a. Chakma Foreigner te chu Dan hmanga hnawhchhuah an nih dawn thu sawiin, kan ramchhung a nihna ang ngeia ram kan neih theihna tura \anlak a \ul thu a sawi a, leilung fate chanvo pawh Chakma te hian min chuhpui fo thu sawiin, ram leh hnam humhalh turin zirna lamah \an lak a \ul thu leh kan ram kan Hnam venghima chhanhim turin rilru thar, lung-rualna leh \anruala put a \ul thu a sawi bawk.
MZP Hqrs. Serchhip chuan thuchhuah siamin Central YMA bultuma CADC \hiah chungchanga Sub-Hqrs. YMA Serchhip in kawng-zawh a huaihawt chu \ha an tih thu leh an thlawp thu an tarlang bawk.

Latest News

Govt. T. Romana College in Cultural Day an hmang

Nimin khan Govt. T. Romana College chuan Republic Vengthlang-a an College hmunah Cultural Day an hmang a, he hun hi Mizoram Journalists...