Mizoram Larsap in Falkawn-a MIMER tlawhin thawktute nen inkawmna an nei

Mizoram Larsap, Kummanam Rajasekharan chuan Inrinni khan Mizoram-a Medical College hmasa ber, Mizoram Institute of Medical Education and Research (MIMER) Falkawn ami chu tlawhin thawktute nen inkawmna an nei a. Hemi hnu hian Falkawn-a Zokhua chu a tlawh bawk.

Larsap hian MIMER hi tlawh hmasain MIMER Director, Dr. Lallukhum Fimate leh Health leh Medical Education Director, Dr. T. Lalhmangaihi bakah thawktu dangten an lo dawngsawng a. Hospital leh Medical College hmunhma te fangkualin, damlo \henkhat te a kawm a ni. MIMER-a thawktute nena inkawmhona ah hian Larsap, Kummanam Rajasekharan chuan Mizoram Governor zinga MIMER tlawhtu hmasa ber a ni chu lawmawm a tih thu a sawi a, Mizoram tana hlawhtlinna lian tak a ni tih sawiin, kan ram chhuanvawr a ni, a ti. Larsap chuan helai hmuna thawktute chu College bultumtu an nih angin, \hangthar lo la awm zel tur ten an thawhrimna te chu an chhinchhiah reng tur thu a sawi a. Khawpuia damdawi In dangte nen tehkhinin MIMER chu a boruak a thianghlimin a hmun a fianrial a, damlo te pawhin hei hi an \hatpui dawn a ni, a ti. Natna hmuhchhuah thar laka mipui an him theih nan Research a ngaihpawimawh thu pawh sawiin Larsap chuan, Hriselna lama inzirtirna pawh uar turin a chah a. India rama Medical College hming-thang berte zing ami a nih theih nan theihtawp chhuahpui a tum thu a sawi bawk.

He hunah hian Dr. L. Fimate chuan State sawrkar inpekna leh \anpuina avanga Referral Hospital chu Medical College-a hlankai a nih thu a sawi a. Sawrkar laipui-a Ministry of Health and Family Welfare a\anga Letter of Permission (LoP) an hmuh tawh thu leh Medical Council of India (MCI) pawhin Medical College bul\an tura a lung-awi thu a sawi a. MIMER chu Medical Institute hmingthang dangte ang bawka Society hnuaia Autonomous Body a ni dawn a ni, a ti bawk.

Larsap hian Falkawn-a Zokhua pawh tlawhin Art and Culture Department Deputy Director, Lalchuailova hovin an lo dawngsawng a. Mizo In hrang hrang enkualpui a nih hnuah a pualin Cheraw leh Solakia te entir an ni bawk.