Tangka sum kan sem lo - Lal Thanhawla

MPCC President leh Chief Minister, Lal Thanhawla chuan, “Tangka sum kan sem a ni lova, a mamawhtu kuthnathawktu te kan \anpui a ni,” a ti.

Nimin-a Aizawl Congress Bhavan-a Political Session neih ah MPCC President leh Chief Minister, Lal Thanhawla chuan thu sawiin Opposition Party te hian tih tur an van hle a, eirukna chungchang ah min mawhpuhna tur an hre lova, mahni hming tilang ngam lovin mi hmingin NLUP an rawn khing ringawt mai a ni, a ti a. “NLUP hian beih a tawk ngun hle a. Mizorama Political party 5 te pawhin an hek tawh. Nimahsela, NLUP hi kan ti tawp dawn chuang lo. Tangka sum kan sem a ni lova, a mamawhtu kuthnathawktu te kan \anpui a ni,” a ti a. Pathian in thil ropui tak min tihsak tih sawiin, “GSDP leh Per Capita Income-ah te nasa takin kan State in hma a sawn a, India ram GDP kan khum theihna chhan hi Pathian lam\ang programme kan neih vang a ni,” a ti a. MIMER an hawng thei chu thil lawmawm tak a ni tih sawiin, “MIMER hawn ni khan Senior Professor, damdawi In changkang tak taka thawkte pawhin MIMER-a rawn insawn an rawn dil a, Lalpa’n thil ropui tak min tih sak hi a thunawn ni rawh se,” a ti bawk.

Tuikuk chungchang sawiin Lal Thanhawla chuan, “Bru te hi Mizoram a\ang chhuak rawh u kan tih a ni lova, anmahni duh thu ngeia chhuak an ni a. Bru te an chhuah lai khan kei phei chu kum 1997 khan Chief Minister ka nih lai a ni a, chhuak lo turin ka ngen nasa. Nimahsela, a rukin pawl an din a, chhuak turin an mipuite an vau nasa hle a. Hindu an nih avangin Central lamin an duat a, dawtin min hek a, Temple tichhia ah te min puh a, kei phei chu RSS ho pawhin lehkha min rawn thawn a. Nimahsela, a endiktu ten Hindu Temple tihchhiat pakhatmah a awm loh thu chanchinbuah an ziak a ni,” a ti. Tuikuk lo kir turte \anpuina chungchang sawiin Chief Minister chuan, “Thuawi a lo kir te sum pe si lova, a thuawi lo te in pe a nih chuan Bru society-ah inhriatthiam lohna a awm thei. Chuvangin lo kir hmasate hi sum pek ve tur a ni. In pe duh lo a nih chuan tualchhungah buaina awm se a mawh in phur ang, ka ti a. Lo awm sa ten \anpuina sum kan duh ve an tih hi ka support a ni,” a ti bawk.