SCERT-a B. Ed. Special Education zirna leh DIET Aizawl-a B.Ed. Education zirna te hawn a ni

School Education Minister, H. Rohluna chuan nimin khan SCERT Auditorium, Chaltlang-ah SCERT-a B. Ed. Special Education zirna leh DIET Aizawl-a B.Ed. Education zirna te a hawng a. SCERT-a B.Ed Special Education zirna hawn tak hi India rama awmchhun ala ni.

Heng B.Ed. zirna tur hawnna hunah hian Education Minister, H. Rohluna chuan B. Ed. Special Education leh B. Ed. Education zirna atana kum 2015 a\anga hmalak puitlin a ni ta chu lawmawm a tih thu sawiin, Mizoram University in Affiliation a pek theih nan te, National Council of Teacher Education (NCTE) in permission a pek theih nan te-a hmalatute chungah lawmthu a sawi a. Zirna \ha zawk kan ram leh hnamin a mamawh avanga SCERT leh DIET Faculty ten hna phurrit dang an la chu fakawm a tih thu a sawi a. B.Ed Special Education Course zirlaite chu Vohbikte enkawlna lamah leh zirtirna kawngah dinhmun pawimawh tak anla chelh dawn tih sawiin, North East mai nilo, India rama B.Ed Special Education zirna awmchhun Mizoram in a nei chu rahbi pawimawh tak a nih thu leh Zirlai mithar leh ni chho mek B. Ed. Special zirtute chu thuawihna, taimakna leh thawhrimna nena zir zel turin a fuih bawk.

Nimin a hawn tak B.Ed. Special Education (Hearing Impairment & Visual Impairment) hi kum 2 course niin, Directorate of SCERT, Mizoram hnuaiah Batch hmasa ber chu August, 2018 a\angin \an a ni a. Hearing Impairment leh Visual Impairment Class-ah hian zirlai 30 ve ve lak a ni a. He B.Ed. Special Course hi Rehabilitation Council of India (RCI), National Council of Teacher Education (NCTE) te pawmpuina in Mizoram University hnuaiah Affiliation pek a ni a. He course hi Vohbik zirtirtu leh enkawltu ten Vohbikte enkawlna kawnga chiang zawk leh chipchiar zawka zirna an pek theihna atana buatsaih a ni.

Nimin veka Education Minister in a hawn B.Ed. Education Programme hi DIET hian ni 15th April, 2018-ah NCTE Inspection a\angin phalna hmuin, 28th May, 2018-ah Mizoram University a\angin Provisional Affiliation hmuh a ni thung a. Academic Session 2018-2019 chu August a\ang hian \an a ni a. Course khat hi kum 2 zir tur bawk a ni.