Freedom from Open Defecation Week khârna inkhawm Serchhip-ah neih a ni

Nimin chhun dar 12:30 khan PHE Department, Serchhip WATSAN Division Office tualah Freedom from Open Defecation Week khârna inkhawm hman a ni.

Freedom from Open Defecation Week khârna inkhawm nimin a neih hi Swachh Bharat Mission (Gramin)-a Serchhip District Coordinator, Samuel Lalawmzuala chuan kaihruaiin he huna thu sawitu PHE Serchhip WATSAN Division-a Sr. Executive Engineer, Er. F. Lalsanglura chuan sawrkar laipuiin August ni 9 a\anga 15, 2018 chhunga Open Defecation Week hmang tura a ruahman angin Serchhip District-ah pawh he hun hi hman a nih thu a sawi a, Serchhip-a khârna hun neih a nih rual hian Leng khua ah pawh E. Lungdar Sub-Division huaihawtin hetiang hun hi hman a nih thu a sawi bawk.

He hunah hian Er. F.Lalsanglura chuan thingtlang khaw fai inelna, Swachh Survekshan 2018 kalpui a nih khan District dangte chet hma-in Serchhip District-ah chuan khaw 18-ah hmalak niin, mipui feedback pawh 2000 chuang neih hman a nih thu a sawi a. Faina kawnga hmalak rual hian mipuite hnena tui in tur mamawh pek lamah pawh hmalak reng a ni tih a sawi a, an bial chhunga nikhata mi pakhatin tui litre 55 (55 lpcd) dawn phak lohna khua te tan Concept note pawh buatsaihfel vek tawh a nih thu a sawi a, thingtlang khua te bawlhhlawh paihna tur (Solid & Liquid Resource Management) atan pawh cheng nuai 200 chuang sanction tawh a nih thu leh hemi atan hian approval pawh hmuh deuh vek a nih tawh thu a sawi a, ODF chhawm nung zel tura \an mar reng a \ul thu sawiin, Serchhip District ODF a nihna atan RD Department-in Convergence hmanga nasa taka an puihna ah lawmthu a sawi bawk.

He hunah hian PHE Department thawktute leh thuthar lakhawmtute an tel a, Serchhip District hi June ni 29, 2017 khan pawna inthiar awm lohna, Open Defecation Free (ODF) District-ah puan a lo ni tawh a, ODF-a puan a nih hnu hian Block Level, District Level leh State Level a\ang bakah Sawrkar laipui aiawhte pawhin enfiah tawhin sawrkar laipui a\angin ODF Certificate hi dawn a ni tawh bawk a ni. Freedon from Open Defecation Week hawnna hi August 10, 2018 khan Hmun\ha khuaah neih a ni a, he Hapta kharna hi Vawiin a neih tura ruahman ni tawh mah se India Independence Day a nih avanga Programme dang lo hman a remchan loh avangin nimin khan hman a ni ta zawk a ni.