Serchhip District chhunga ASHA te tan Serchhip-a Refresher Training neih \an a ni

Serchhip District chhunga Accredited Social Health Activist (ASHA) te tana Refresher Training chu nimin khan Serchhip CMO Conference Hall-ah neih \an a ni a, he hun hi National Health Mission-a Mission Director, Dr. Lalrozama IAS chuan khuallian niin a hmanpui.
Serchhip District chhunga ASHA te tana Refresher Training hi chhawng thum-a neih tura ruahman niin nimin a Training-ah hian Serchhip Main Centre leh Chhingchhip leh Thenzawl CHC hnuaia ASHA te an tel a, he training hawnna hun Serchhip CMO Conference Hall-a neih hi Dr. Laldawngliana Sailo, CMO Serchhip chuan kaihruaiin khuallian nia he hun hmanpuitu Dr. Lalrozama IAS chuan ASHA te chu Health Department nena thawkho an nih thu leh hna pawh an ngah thu sawiin, mipuite hriselna atana a bulthum-a thawktu chu ASHA te an nih thu a sawi a. Tunhnaiah Health Minister hmalakna azarah an Department chuan hmasawnna tam tak an neih thu sawiin, an hmalakna avangin Nu naupai enkawl tam ber lawmman pawh tunhnaia an dawn thu a sawi a. He an lawmman dawn hi ASHA leh Health Worker te thawh \hat vang a nih thu sawiin, an hna chu Pathian rawngbawlna a ni tih hriaa zelthel taka thawh a rem lo tih hre reng turin a chah bawk.
He hunah hian Dr. R. Lalchhuanawma, State Nodal Officer (CP) chuan an hmalakna te leh tuna an dinhmun tlangpui tarlangin, sawrkar in mipuite tan Scheme leh Programme te siam \hin mah se a nih tur ang a nih theih nan mipui ten an hriat ve a \ul thu a sawi a. Chumi atan chuan mipuite zirtir an \ul thu leh ASHA leh Health Worker te chu a thawk nasa ber te zing ami an nih thu a sawi a. Community Process hnuaiah Platform lian tak tak pahnih (2),Village Health Sanitation Committee (VHSC) leh ASHA te sawrkarin a kalpui mek thu sawiin, Mizoram-ah Village Health & Sanitation Committee (VHSC) 830 din anih thu leh chung zinga 46 chu Serchhip District chhung ami anih thu bakah Mizoram pumah ASHA hna thawktu mi 1094 an awm thu a sawi bawk.
Nimin a he hun hmanna ah hian kalkhawmte a\angin zawhna leh chhanna hun hman a ni a, chawhnu lamah Training Session hmangin C. Lalthanzami, State ASHA Trainer, Deborah Vanlalchhuangi, DPM & District ASHA Trainer leh Lalmuankimi Sailo, ASHA Coordinator, Serchhip District ten ASHA tihtur leh an hriat tur hrang hrang bakah mipuite tana hna an thawk dan tur te an zirtir a ni.
Serchhip District chhungah hian ASHA 64 leh Mobilizer 7 awmin heng mite hi Co-Ordinator pakhat leh DPM pakhat in an enkawl a, Vawiin a Training buatsaih a nih bakah hian Tuichangral lama ASHA te leh Ngentiang CHC hnuaia thawkte tan a hran-a la buatsaih leh tura ruahman a ni.

Comments

Popular posts from this blog

PAN CARD an tih teh fo hi - Laldinpuia