Finance Minister nen State Lottery-ah hian naia sen khat pawh kan ei lo - Lal Thanhawla

MPCC President leh Chief Minister, Lal Thanhawla chuan, “Kan Finance Minister leh Lal Thanhawla te hian State Lottery-ah hian naia sen khat pawh kan ei lo,” a ti.
Nimin a Aizawl Congress Bhavan-a Political Session-ah Chief Minister, Lal Thanhawla hian State Lottery chungchang hi sawiin tunlaiin eptu party pakhatin State Lottery an tuipui hle tih sawiin, “An sawrkar hunlai khan State Lottery hi \enghneng takin an lo kalpui \hin a. Khang hunlai a\ang tawh khan State Lottery kal dan hi lo tuipui tawh se a \ha tur a ni,” a ti a. “May 17, 2017-ah hemi chungchang ah hian CBI ko lut turin ka hnenah an rawn thlen a. A tukah Chief Secretary hnenah, hma lo la turin ka ti nghal. Ka intiam tawhna angin Lottery leh Mizo Carbon chhui turin ka ti,” a ti a. “Mizo Carbon-ah chuan CBI chuan, ‘Chhui \ul kan ti lo ve,’ tiin Imphal leh Delhi-a an hmunpui a\angin min rawn chhang a, Lottery-ah chhanna kan la hmu lo. Hemi chungchangah hian engpawh kan ngam a ni tih lo hria ula ka duh a ni,” a ti a. MPCC President chuan, “MNF te hian an sawrkar lai khan State Lottery-ah an pu ten ei an nei \hin tih an hria a, khatiang ang khan kan ei turah ngaiin an tuipui a, mahse chutiang ang in kan ti ve lo. Kan Finance Minister leh Lal Thanhawla te hian State Lottery ah hian naia sen khat pawh kan ei lo,” a ti bawk.
Chief Minister hian Tuikuk laklet chungchang pawh sawiin sawrkar hotute leh central hotute vawi tam tak an inbiak hnuin hmanni lawkah Union Home Minister, Rajnath Singh hovin September ni 30 hmaa lo kir turin remna an siam ta tih a sawi a. Hemi chungchangah Mizoram tlawmngai pawl hrang hrang inzawmkhawm ten Tuikuk hruailet tura ruahmanna te \ha an ti chu lawmawm a tih thu a sawi a, “Tlawmngai pawl te leh Sawrkar hi Tuikuk chungchangah kan inrawnin kan thawkho \ha hle a, hetianga Tuikuk laklet chugchang \ha an ti hi an chungah party hmingin lawmthu pawh ka sawi nghal a ni,” a ti a. Union Home Minister hova thutlukna ziahfel anih hma hian thuawih-a lo haw hmasa Tuikuk te \anpuina pe fumfe lova, a thuawih lo zawkte chhawmdawlna pek chu \ha an ti lo tih sawiin, Union Home Minister pawhin Home Secretary te a koh nawn phah hial tih a sawi a, chuti chungin hetianga kalpui tura an lo inrem tawh si avangin tun ang hian kalpui phawt a ni anga, Mizoram-a let hmasa te chungchang chu ngaihtuah zu izel turin an ti ta tih a sawi bawk.
Chief Minister chuan NEC Meeting-a Shillong-a a kal chungchang pawh sawiin, NEC chu Development leh thil dangah hmarchhak state te kan hnufum bik loh nan leh tihchakna atan din a ni tih a sawi a. Chutih lain NEC-a kan budget tihhniam leh thuneihna chhuhsak tumna deuh sawrkar laipui a\angin a awm niawma an hriat thu leh chu chu na taka an do thu a sawi a, “NEC dinchhan leh kan tum ram min thlenpui lovang tih a hluahawm avangin hetiang zawnga NEC tih tumna hi \ha kan ti lo a ni tih hmarchhak state aiawh ten kan sawi tlang a ni,” a ti bawk.

Popular posts from this blog

PAN CARD an tih teh fo hi - Laldinpuia