Sum lakluh phak baka hausa-ah Home Minister puh

PRISM Party General Secretary, SL. Ngursailova Sailo chuan Mizoram sawrkar-a Home Minister ni mek, R. Lalzirliana chu a sum lakluh phak baka hausa nia a hriat thu a sawi.

PRISM Party General Secretary, SL. Ngursailova Sailo hian nimin khan Aizawl-a PRISM Office-ah thuthar thehdarhtute kawmin tlangkam a\angin Durtlang Mel 5 Veng-ah In ropui tak Home Minister, R. Lalzirliana’n a sak thu an hriat thu leh he In hi an en nghal thu sawiin, inthlan dawna a hausakna a puanchhuahna te zirchiang nghalin hetiang In sa thei khawp a sum nei a nih leh nih lo uluk takin an zir zui nghal tih a sawi a. “Kum 2003 inthlan dawna a thil neih a puan chu pawisa Rs. 17,00,000/- a ni a. Maruti Udyog leh Gypsy a nei a. In (Buiding) 4 neiin heng a In hlut zawng hi Rs 32,19,882/- a ni a. Tichuan a hausakna hi Rs 49,19,882 leh Maruti leh Gypsy a ni,” a ti.

PRISM Party General Secretary chuan Durtlang Mel 5 Veng-a In ropui tak a sak nia sawi hi an belhchian hnuin chhawng 5 a sang niin a hlutna hi, PWD SOR 2013 anga chhut chuan cheng nuai 150 vel nia a lan thu leh inthlan dawna cheng nuai 51 vel nei anga insawi siin kum 5 chhunga cheng nuai 150 man vel In a sa thei chu mipui hriatah a sawifiah an phut thu a sawi a. “Pu R. Lalzirliana hian Minister anih avangin thla khatah Rs. 88,000/- vel hlawh a, kum khatah Rs. 10,56,000/- vel tihna a ni a. Kum 5 chhunga a hlawh lak belhkhawm hi Rs. 52,80,000/- vel chauh ni tur a ni a. A hlawh pumpui pawh In saknan hmang se cheng nuai 150 seng tur chuan a hlawh hian Rs. 9,72,000/- velin a la daih dawn lo a. Prevention of Corruption Act, 1988 Section 13 (i) (e) hmanga hrem tur ni ngeiin a lang,” a ti a. “Hetiang anih avang hian engtia a neih nge sawifiah ngei turin kan phut a. A sawifiah thei lo a nih chuan, kan sawrkar ngei dawn a, kan sawrkar hunah Jail bang a zut ngei ang.” a ti bawk.