Electric chhiatna la hrelo

Serchhip leh Zuangtui inkara 132kV Line chhia chu siam\hat tuma hmalak zui zel a ni a, nimin a ni 4-na thleng khan line chhe lai hi hmuh ala ni lo thung.

Kar kalta Zirtawpni-a Power & Electricity Department ten hna an thawh dawn avanga Shut-Down an lak hnua Serchhip leh Zuangtui inkara 132kV Line chhia chu P&E Department chuan buaipui zelin nimin, a ni 4-na thleng khan line chhe lai hi hmuh ala ni lo a. He Electric line chhia hi Serchhip P&E Department chuan Executive Engineer, Michael L. Pamte hovin a chhe lai zawngin an thawkchhuak mek a, he thu buatsaih lai, nizan zantir lam khan Baktawng Chan In hnuai ramhnuai ah ban enfiah turin an kal leh mek a ni.

Serchhip-a P&E Department hotute chuan Bukpui leh Zuangtui inkar hi a hrui an enchhuak vek tawh tih sawiin, amaherawh chu a chhe lai hi an hmu mai lo tih an sawi a, hei vang hian Electric ban te enfiah lehin a chhia nia an rinhlelh te thlak zelin enfiah zel a ni a, amaherawh chu tun thleng hian a chhe lai hi an la hmuchhuak theilo thung. He Line chhia avang hian Serchhip khawchhung chuan khaihlak lutuk awm lovin tunah hian Eng a hmu thei tawh a, amaherawh chu Mizoram chhim lam te erawh chuan Eng hi an la hmu mumal theilo a, Serchhip-ah pawh mamawh khawp Power hmuh tur a awm loh avang hian Tui pump kawngah harsatna a thleng nia thudawn niin tunkar ah mipuite hnenah Tui hi sem mumal theih ala ni lo nia thudawn a ni a. Line chhiatna lai hi hriat theih ala nih loh avangin engtia rei nge Power hi a khaihlak dawn hriat ala ni lo.