Bung Bangla Quarry a chim; Mi 4 in nunna an chan; Nimin ah ruang hmuh kim a ni

Inrinni zing dar 7:40 vel khan Zemabawk leh Tuirial inkara Bung Bangla quarry chu chimin mi 4 a delh hlum ni a hriat a ni a, LPK tipper 2 a delh chhe tel bawk a, he Quarry chim in a chhilh nia hriat mi 4 te ruang hi nimin chhun khan hmuh kim a ni.
Zemabawk leh Tuirial inkara awm Bung Bangla quarry-ah hian lungla leh rora chhu a inhlawhfa mi engemaw zat an awm \hin a, thudawn danin Inrinni zing-a chhiatna thlen lai hian hnathawk an la tamlo a, mit a hmutu te sawi danin, quarry hnuaia awm ten hna an thawh laiin a chunglam a\angin quarry hi a chim \an a, a hnuaia hnathawk a awm te pawh hian hei hi hria in, insaseng pawh an tum a, amaherawh chu quarry chim hian a chhilh hman a, vanneihthlak takin quarry chimna thlang, motor kawngpui sir a rora chhu te erawh chuan hliam an tuarlo a. Lung tla hian mihring 4 a chhilh nia hriat niin heng mite tihloh hliam tuar dang an awm hriat a nilo a, LPK Truck pahnih chu chilh bawkin pakhat zawk phei chu lang awm lovin a chhilh bo vek a ni.
He Quarry a chim thu hriat a nih veleh mi tlawmngai tam takin Bung Bangla quarry hi an pan nghal a, State Disaster Response Force (SDRF) te pawh an hmanrua te nen an thleng bawk a, mihring a chhilh nia hriat mi 4 te hi zawn hna thawh nghal niin JCB leh Hitachi khawl lian te hmanga zawn a nih hnuah Inrinni khan ruang pahnih hmuh niin nimin khan ruang dang pahnih hmuh leh a ni a, heti hian he vanduaina thlenga nunna chan te ruang hi hmuh kim nia hriat a ni. He vanduaina thlenga nunna chan te hi Lynda Hmingthianghlimi (14), Zemabawk Bethel Veng; Eudi Lalremzovi (10) leh a nu, Lynda Zodinpuii (32), Zemabawk Lungbial Veng leh Munga (40), Zemabawk Berawlui te an ni a, nimin khan vuiliam an ni.
PRISM chuan he thil thleng hi pawi an tih thu leh vanduaina tawk te an tawrhpui thu sawiin, sawrkarin quarry enkawlna dan leh khuahkhirhna awmze nei zawka a kalpui loh vangah an ngaih thu an sawi a. Lung quarry chim vangin Mizoram-ah chhiatna a thlen fo bakah nunna hial chan an awm \hin chu pawi an tih thu sawiin, sawrkarin hetiang chhiatna thleng \hin hi enliam satliah mai lovin ngaimawha a ven dan dap thuai se an duh thu an sawi bawk.
August 3, 2012, chhun dar 11:00 vel khan Bung Bangla quarry hi alo chim tawh a, hemi \um hian Serchhip a\anga Aizawl pan a tlan Taxi pakhat chu hnawlin, Serchhip P&E Veng-a khawsa mi pahnih (pafa) leh hmeichhia kum 50 mi pakhatin nunna anlo chan tawh a, midang 3 in hliam an lo tuar tawh bawk a ni.

Popular News

PAN CARD an tih teh fo hi - Laldinpuia