H&TE Minister in Cash Incentive Award hlan

Mizo \halai UPSC exam pe-a Cash Incentive Award dawng thei tura inziak tling mi 11 te hnenah nimin khan Higher & Technical Education Minister, R. Romawia chuan Cash Incentive Award cheng nuai khat \heuh a hlan.
Cash Incentive Award hlanna puala inkhawm Secretariat Conference Hall-a neih ah H&TE Minister, R. Romawia chuan Mizoram sawrkara dinhmun pawimawh tak tak chelh tur Mizo IAS officer kan awm ta manglo chu a pawi hle tih sawiin, hei hian mipuite leh sawrkar indawrna kawngah harsatna a awm phah thei tih a sawi a. Tun \uma an sem Cash Award hian UPSC exam paltlang tura inbuatsaihna kawngah Mizo \halai tam zawk tan la tura a cho chhuah ngei a beisei thu a sawi bawk.
He hunah hian Lalrinliana IAS, Commissioner & Secretary, Higher & Technical Education Department chuan UPSC exam chu intlansiakna a nih thu sawiin, tlan thlen ringawt tawk lovin, a thleng hmasa ber nih a \ul a, chuvang chuan tihtakzetna tello chuan hlawhtlin a harsa hle a ni, a ti a, \halai UPSC exam bei turte chu tumruhna nena theihtawp chhuah turin a fuih bawk.
He hunah hian mi 11 hnenah Cash Incentive Award hlan a ni a, UPSC hnuaia NDA & Naval Academy exam paltlang 4, Combined Defence Services exam paltlang 1, UPSC Civil Services Prelims paltlang 5 leh Mains paltlang 1 an tel a ni.
Incentive Cash Award hi kum 1992 khan UPSC exam a Prelims emaw, Mains emaw-a tlingte hnenah Rs. 5000/- pek \hin a ni a, kum 2004 khan Rs. 10,000/- ah tihpun a ni leh a, Higher & Technical Education Department hnuaia Mizoram Scholarship Board meeting 2017 chuan Cash Award hi cheng Nuai khat ah a ti sang leh a ni. He lawmman dawng tur chuan Mizo \halai Mizorama cheng nghet, UPSC exam (Prelims emaw Mains) a in ziaktling an ni tur a ni a. Candidate te hian Coaching an kal a nih chuan Rs. 20,000/- thleng leh Hostel a awm an nih chuan Mess fee Rs. 2000/-, thlaruk chhung an dawng thei bawk a ni.

Popular News

PAN CARD an tih teh fo hi - Laldinpuia