Latest News

Serchhip-a Doctor leh Nurse ten naupang te venhimna leh humhalhna Dan zirhona an nei

Serchhip damdawi In a thawk Doctor leh Nurse te tan nimin khan naupangte venhimna leh humhalhna Dan hrang hrang zirhona neih a ni.
District Child Protection Unit, Social Welfare Department buatsaih he zirhona Serchhip CMO Conference Hall-a neih hi District Child Protection Officer, Lalsiampuii chuan kaihruaiin naupangte chu kaihhruai ngai leh venhim ngai an nih thu a sawi a. Sawrkar chuan naupangte venhimna atan hian Dan hrang hrang a siam thu leh hrang Dan hrang hrangte hi mipuite pawhin kan hriat a \ul thu a sawi bawk.
Nimin a naupangte dikna leh chanvo chungchang zirhona hunah hian R. Lalramdinmawii, Protection Officer (Institutional Care) chuan naupang kum tlinglo pawi khawihna a inhnamhnawih te hremna dan leh humhalhna dan, Juvenile Justice Act chungchangah zirtirna pein Chanchinbu, chanchinthar thehdarhna leh a kaihnawih hrang hrangah te naupang kaihnawih thubuai chhuina leh thubuai kalpui dan te an puanzarna ah naupang chu an nihna tilang thei tura puanzar leh an thlalak te pholan phal a nih loh thu a sawi a, he Dan bawhchhetu chu thla ruk (6) thleng lung In tantir emaw, cheng nuai hnih (2) thleng pawisa chawitir emaw, a pahnih emawa hrem kawp theih a nih thu a sawi bawk.
He hunah hian Liansangpuii, Protection Officer (Non-Institutional Care) chuan Dan hmanga naupang fa atana lak (Adoption) chungchang ah zirtirna pe bawkin, tunhma lama dan mumal tak awm lova Fa lak (Adopt) kalpui \hin chu tunah chuan Dan ang thlapa kalpui a \ul tawh thu leh Fa la duh nu leh pa te pawh an dinhmun zirchian hmasak vek \hin a \ul thu a sawi a. Thusawitu dang District Child Protection Officer, Lalsiampuii chuan naupangte hursualna lak atan venhimna leh humhimna dan, Prevention of Children from Sexual Offense (POCSO) chungchangah zirtirna pein kan ramah naupang kumtlinglo pawngsual leh khuaikhem tawk tam zel tur venna kawngah mitin ten theihtawp kan chhuah tlan a \ul thu a sawi bawk. He zirhona hunah hian Serchhip Damdawi In-a thawk Doctor leh Nurse \hahnem tak an tel a ni.

Comments

Popular News (Last 30 Days)