CM Hawla Affidavit chungchangah mipuiin thudik kan hre chak!

CM Hawla Affidavit chungchangah mipuiin thudik kan hre chak!

- Kapliana Pachuau, Serchhip

Tunlaia Mizoram mipui titi ber chu Kolkatta khawpui New Town a Chief Minister Pu Lal Thanhawla’n In a sak mek chungchang hi a ni awm e. Hemi chungchang hi tunhnai khan Serchhip pa, Pu Hriata Chhangte, Kolkatta a awm mek chuan a Document te haichhuakin Social Media ah a tarlang a, chumi hnuah Nov. ni 11 khan ZNP |halai in an President Pu Lalmuanpuia Punte hovin Press Conference hovin an umzui a, Nov. ni 11 khan hemi thu kalzelah MNF |halai ten Session-na a CM kal tur dan tumin Police te nen an innawr phah chiam bawk a, engpawh nise Mizoram Chief Minister, Serchhip Bialtu MLA nilai chunga thil thleng hi ngawihbopui mai chi a ni lovang!

Social Media lama Pu Hriata Chhangte in a rawn tarlan dan chuan CM Hawla hian Kolkata Salt Lake-ah building sak mek a lo nei reng a. He a building sak mekna hi West Bengal sorkar Land Records-a a lan dan chuan Plot No. AI-178, 3228 Sq. feet a zau niin a neitu pawh Shri Lal Thanhawla s/o Late H.P. Sailo, Zarkawt, Aizawl, tih leh ni 30 August, 2013 khan register a ni tih tarlan a ni a, hetihlai hian kum 2013 MLA Election dawna Pu Lal Thanhawla'n Serchhip bial candidate ni tura Election Commission of India (ECI) hmaa chhechham meuha affidavit a thehluhah he Kolkata-a a ram/inhmun hi a lo ziak tel lova.

Hetianga mahni thil neih (assets) thehluh kim loh emaw dik lova ziah, 'False Affidavit' hi The Representation of The People Act, 1951 Section 125 A in a sawi ang chuan kan Chief Minister Pu Lal Thanhawla hian mipui leh sorkar a bum avangin leh ECI chuan MLA a nihna a\anga ban tir (disqualified) leh MLA chuh nawn theilo tur thlenga hrem/action lak theih a ni tih a ni.

Hetihlai hian Nov. ni 15 khan khan MPCC Media Department chuan Press Conference neiin “Kum 2011 April 13 khan West Bengal sorkar chuan W. Bengal Housing Infrastructure Development Corporation Chairman quota in India mi langsar zual te hnenah Kolkata khaw pawn Satellite Township New Town-ah inhmun engemawzat a sem a, Pu Hawla pawh telin kum 2013 khan tihfel thawkhatin a tifel a, August 30, 2013 khan West Bengal HIDCO nen Deed of Agreement siamin, Pu Hawla hian Tax neuh neuh leh chawi tur cheng nuai 17, sing 6, sang 1 leh 760 a pek hnuin New Town ram ruak pakhat chu a hmingin a awm ta a. Hetia a hminga a awm hnu hian Pu Hawla hian a nihna tak tak a la nei theilo a, New Town Kolkata Development Authority hnuaiah inziahfel a ngai a, A neitu nihna tak hi kum 2013 Mizoram Assembly inthlan zawhfel vek hnu July 25, 2014-ah tihfel a ni chauh a, heta thil chiang em em chu kum 2013 Assembly inthlan dawna affidavit siamah khan Pu Lal Thanhawla hian New Town-ah hian inhmun nei angin lo insawi se, dawt a sawi a ni zawk dawn a, ECI a kan party President, Chief Minister Pu Hawla hekna hi dan hnuaiah thutlinglo a ni,” an ti ve thung.

Mizoram-ah hian thu inchuh, mipuiin a dik zawk an hriat hleihtheih loh te, a hmawrbawkna awm mumal lova zu zi ta mai mai te, a tawpa 50-50 a sirtlukpui tak ngawt te a tam em em mai a, Politician ho dawta an inchirhthehna karah mipuiin thudik kan hre hleithei lo hi a thinrimthlak takzet tawh.

Pu Hawla Affidavit chungchangah pawh hian Zoram mipuite thu dik, rin tur zawk hre lovin kan hawihai mek a, kan ram hruaitute hian Mizo mipui te hi thudik tak min hrilh teh u. Mipuiin thudik kan hre chak!!!