Biate in Mizoram-a khaw fai ber an nih lawmna UD&PA Minister hovin an nei

Mizoram sorkarin kum 2017-a Mizoram khawpui fai bera a thlan Biate khua chuan nimin khan an lawmman lak lawmna an nei a. He hun hi UD&PA Minister, Zodintluanga chuan khuallian niin a hmanpui a ni.

Zialung Community Hall, Biate-a Mizoram-a khawpui fai bera thlan an nih lawmna hunah hian UD&PA Minister chuan sorkar \anpuina tel miah lova khaw fai ni tura Biate mipuiin hma an lakna chu entawntlak a tih thu sawiin, Mizoram khaw tam tak tan entawntlak an nih thu a sawi a, Faina chu sorkar tih tur bik a nih loh thu leh faina chu mitin leh khaw tinin keimahni tan vek a nih angin mawh kan phur tih a sawi a. Biate chauh ni lo, Khawhai, Sialhawk, East Lungdar, Leng leh a tlangdung khaw hrang hrang chu khaw fai tak vek an nih avangin faina hmunpui ni chho zel turin Minister chuan a chah bawk.

Mizoram-ah Indian Film Festival neih tumin Sorkarin ruahmanna thui tak siamin, Innovation India, Indian Film Festival khawvel hmun hrang hrang a buatsaih \hinte nen an inbe mek tih UD&PA Minister chuan a sawi a, January thla chawhnu lamah Indian Film Festival  hi neih tum a nih thu leh he hunah hian Faina pual video tawi siam intihsiakna buatsaih tum a nih thu a sawi a, hemi hmang hian Biate faina chu khawvel pum mit hmuhah tarlan a ni dawn tih a sawi a. Khawvel ram hrang hranga a\angin bengvartu leh tlawhtu te pawh an neih phah an beisei bakah Biate khaw faina hi khawvel pumah zirtir an duh tih a sawi bawk.

UD&PA Minister hian Biate fai lawmpuina atan hian sorkar a\angin cheng nuai 50 a hlan nghal a, sorkar chuan pawisa faia a hlan a thian loh avangin cheng nuai 50 man project lo ruahman turin VCP hnenah a hlan a ni.

Nimin a Biate in khaw fai lawmman lak an lawmna hunah hian Khualzahawm, bialtu MLA leh Fisheries Minister, Vanlalawmpuii Chawngthu pawhin an bial chu fai tak vek an ni tih sawiin Mizoram-a bial fai ber ni turin theihtawp chhuah turin kalkhawmte chu a sawm a, Biate chu khaw inlungrual tak an nih thu leh, India ram khawpui fai inelna ah an tel dawn thu sawiin, a fai ber lawmman dawng thei ngei turin theihtawp chhuah leh turin kalkhawmte chu a sawm bawk.

UD&PA Department chuan kumin hian Mizoram-a District Headquarters leh Census Town khua-ah fai inelna a siam a. Cencus Town zingah Biate hi khaw fai berah thlan niin District Hqrs. leh Cencus Town lakkhawm-ah pawh khaw fai berah thlan an ni bawk a. Nimin a khaw fai ber nih an lawmna hunah hian Faina kawnga an hmalak dan hrang hrangte ngaihthlak a ni bawk.