Service Voters Registration kalphung thar zirhona nei

Election Commission of India in Service Voter Online Registration kalpui dan thar a ruahman chu nimin khan Serchhip District chhunga Electoral Roll khawihtu Officer- ERO, AERO leh EO ten chuan an zirho a, he hun hi District Election Officer, Sangchhin Chinzah chuan a hmanpui a ni.

Serchhip DC Office-a Video Conference Room-a he zirhona hunah hian Abraham B. Khithei, Election Officer Serchhip leh Beithlotha Nohro, AERO ten EROnet hmanga Service Voters Registration kalpui dan hi a lem nen an entir a, zawhfiah ngai awm te an inzawtfiah bawk.

Election Commission of India chuan, ramchhunga Service Voters registration chu a thar hlaka thlaka, Intensive Revision nei nghal tura ruahmanna a siam angin August ni 25 hmain Services Authority te chuan  a thar vekin Voters Registration dilna an rawn thehlut anga. September ni 4-ah Draft Publication neih zui niin tun hmaa lo hman tawh Service Roll chu paih bo zui a ni ang. Draft Publication leh Form thar lo lut zawng zawngte chu AERO leh ERO ten an endikin, an kalna tur District, Constituency leh Polling Station te an thliar vek ang a. Chu chu Chief Election Commission ah an thawn thla anga, an ni lamin an lo zirchian hnuah District lamah ennawn tura thawn lehin, a dik leh dik loh enfiahna hi \um engemawzat an neih hnuah October ni 18 ah Final Publication neih tur a ni dawn a ni.

Heng hna zawng zawngte hi Electoral Roll buaipuina tur Computer Programme thar, ERONet hmang veka thawh tur a ni dawn a, chumi hmanga a taka kalpui dan tur zirhona leh sawi-hona hi he hunah hian neih a ni.