MNF Party in Aizawl khawpui chhungah Furpui Campaign an buatsaih

MNF Party chuan nakum-a MLA inthlan lo awm tura inpuahchahna atan Inrinni zing khan Aizawl veng hrang hrang Kawn lunlaiah Furpui Campaign an hmang.

MNF Party in Aizawl khawpuia Furpui Campaign an neih ah hian Aizawl khawpui chhung hmun 10-Zemabawk, Ramhlun, Chanmari, New Market, Tennis Court, Thakthing, Khatla, Vaivakawn leh Ramrikawn-ah te hun hman niin, MNF hotu lawk tak takin thu an sawi a. Khatla Kawn Bazar-ah K. Sang\huama, MLA chuan thusawiin sorkar tihdikloh te sawisel ngawr ngawr an tum a ni lo tih a sawi a, "Sorkar a insiam\hat beiseiin kan sorkar tih dik loh kan sawi zawk \hin a. Vawiin thlenga insiam\hatna hmuh tur a awm loh avangin khawlaiah mipuiten min hriatpui tura puanzar a lo ngai ta a ni," a ti a. NLUP chu cheng 2 pe-a nuai khat dawng tur angin mipuiah an inzuar tih sawiin, "2008 a\ang khan an lo tlinpui tawh a. Installment-ah \henin cheng sing hnih/khat te te in an sem leh si a, chhungkaw tana dinchanna khawpin an pe lo hrim hrim," a ti a. "CAG-in a rawn endik a, hlawhtlinna kan hmu lo, ‘NLUP hi a hlawhchham a ni’ an ti a. India ram pum pawisa endiktu CAG report hi thudik tak a ni a, dawt anga sawi phet an tum pawh hi sim rawh se. NLUP hi party party induhsak nan leh chhungte induhsak nan nasa takin an hmang a ni," a ti bawk.

Zemabawk kawn-a thu sawitu Lalruatkima, MLA chuan, MPF Office hial Congress mi leh sa in an kalchilh chu pawi a tih thu sawiin, "Miin thudik an sawi avanga nà kan ti zel dawn a nih chuan inenfiah hle kan ngai tihna a ni," a ti a. July ni 14 khan Chief Minister, Lal Thanhawla'n 'Kan party mi ni lo chu eng atan mah ka ti lo' tih a sawi nia sawiin, "He thu hian Congress rilru puthmang chu a tichiang hle. He Congress sorkar hian mipui a huapzo thlawt lova, lalchhungkua leh party mi lehsa inlulinna leh invulhna sorkar a ni," a ti a. Kum 2018 inthlanah MNF-in sorkarna a siam ngei a rin thu sawiin, SEDP hmangin mipuite thleng phah hmasawnna tak tak MNF chuan a kalpui tur thu a sawi bawk.

Er Lalrinawma MLA pawhin Tennis Court tualah thusawiin, kawngchhia sorkarin tihngaihna a hrelo chu mak a tih thu a sawi a. "Nikum hmasa khan Assembly House-ah kawngpui siam\hat chungchangah resolution kan pu lut a, hnawl a ni tawh a. Kan kawngpui a chhe zel a, nikum hmasaah kawngpui a chhe em em a, nikumah a hma kum aiin a chhe lehzual a, tuna kan kal dan chuan kawngpui \hat ngaihna a awm lova, kalphung thar a ngai a, chumi tur chuan MNF kan inbuatsaih mek a ni," a ti a. "Medical bill heng RSBY, Smart Card, Health Care te ti ve turin mipuiin cheng 500 te, cheng 750 te kan sawi a, kan inenkawlna daih pawh kan bill chhuak thei meuh lo. Kan Health Care hi sa\ahchhuak pek ang chauh a ni," a ti bawk.