Khawvel hmundangte rualin Serchhip-ah World Population Day 2017 hman a ni

Nimin khan Serchhip-ah World Population Day 2017 hman a ni a, kumin hian World Population Day-ah hian “Beiseina thar, Hmasawnna thar”, “I chhungkaw hmasawnna chu i mawhphurhna pumhlum a ni” tih chu thupui ah hman a ni a, he hunah hian Serchhip District chhunga Health Department-a thawktute an tel a ni.

Serchhip CMO Conference Hall-a he Ni puala inkhawm ah hian Serchhip Sub-Hqrs. YMA-a Vice President, Kawl\huama chu khuallian ah hman niin khuallian chuan damlo leh \anpui ngaite \anpui \hintu damdawi In-a thawk, kalkhawmte chu damlote tana pan nuam leh biak nuam tak ni zel turin a ngen a. Sorkar laipuiin Population control hi ngai pawimawh viau mahse Mizote tan erawh chuan chhungkaw hung tak nih hi kan la mamawh a, chutih rualin chhungkaw hung tak intodelh lo nih erawh thil \halo tak a ni a, chhungkaw inrelbawlna \ha erawh kan inzirtir uar zel a \ul a ni, a ti.

He hun kaihruaitu Dr. Laldawngliana Sailo, CMO Serchhip chuan tunhma deuh khan Population control hi kan ti nasa tih sawiin, “Fa neih tlem kan inzirtir \hin a, mahse Mizo te hi hnam tlemte kan nih avangin fa neih tlem aiin fa neih tam inzirtirna hi Kohhran leh khawtlang ah chuan kan uar leh ta zawk a. Chutih rual chuan mipui pun chak em emna ram India-ah kan awm avangin sorkar laipuiin hmalakna tura ruahmanna a siam chu kalpui a \ul a ni,’ a ti a. “Population Day kan hmana kan ngaihtuahna luah \hintu pawimawh tak chu Family Planning chungchang hi a ni a, chu chuan chhangkhat taka fa tlemte neih mai hi a kawk lova, chhungkaw din tura ruahmanna mumal tak nei turin min zirtir zawk a ni,” a ti. Hei bakah hian Dr. Laldawngliana Sailo chuan, “Sorkar hian fa neih tlem ringawt hi min zirtir a tum a ni ber lova, Fa neih tlem ngawr ngawr aiin kan chhungkaw dinhmun ngaihtuah chunga khua leh tui \ha tak ni thei tura kan enkawl theih tawk tur ka neih a \ul a ni,” a ti bawk.

World Population Day 2017 hi thla khat chhung hman tur anih avangin hmun hniha \hen a ni a, June ni 27 a\anga July ni 10 thleng khan Mobilisation Fortnight atana hman niin nimin, July ni 11 a\anga July ni 24 thleng hian Population Stabilisation Fortnight atana hman leh a ni ang.