Remchan zawkna avangin Serchhip-ah Chapchar Kut hman hun tur sawn a ni

Kumin a Chapchar Kut lo thleng tur, March 3-a hman tura tih chu Serchhip-ah chuan remchan zawkna avangin March 24-ah hman tum a ni.

Nimin khan Serchhip DC Committee Room-ah District Bawrhsap, Dr. Lalrozama, IAS hovin kumin a Serchhip-a Chapchar Kut hman dan tur sawihona hi neih a ni a, hunah hian Chairman, Dr. Lalrozama, IAS chuan, “Kan hnam zia leh nunphung \ha te, kan tu kan fate hnena hlan chhawng zela zirtir zel tur kan ni a, hnam-a min siamtu Pathian hre renga he hnam hi kan chawi nun zel a \ul a ni,” tiin chumi atan chuan Chapchar Kut chu hun remchang ber pakhat a ni, a ti a. Chapchar Kut hlawhtling taka hman chu NGO tan emaw, sorkar tan emaw chauh tih theih a nih loh thu sawiin, mipuite nen thawhhona ngai a nih thu a sawi a, Serchhip mipuite a tam thei ang ber an tel theihna tur leh naupangten pipute zai, lam leh nun dan mawi tinreng zirthiamna hun \ha atana an hman theih ngeina tur Kut buatsaih ngei a \ul thu sawiin, Mizo Culture vawnghim tura intihphurhna te, inzirtirna te leh intihhlimna hun te a nih thu a sawi bawk a ni.

He meeting-ah hian Sub-Hqrs. YMA leh Sub-Hqrs. MUP lam ten rawtna an thlen angin a hun atana lo ruat lawk March ni 3-a hmang turin Serchhip-ah harsatna a awm nia hriat a ni a. Serchhip-a Chapchar Kut hmanna \hin, khawchhung laili-a Playground, Leisekawt Field chu Presbyterian Kohhran Hmeichhe Khawmpui lian, March 9-12 chhunga neih tur atana Pandal sak a nih tawh avang leh Serchhip Hmar Veng-a Playground chu Sport Complex atana sak mek (under Construction) a nih vang te, Khawtetlang-a DC Playground chu mipui nunau tan leh veng \henkhat tan a hlat bawk si avang te; Serchhip mipuite Kohhran Hmeichhe Khawmpui lian atana an inbuatsaih vanglai a nih thu te he hunah hian sawichhuah niin, heng thilte hi ngun taka ngaihtuah a nih hnuin member kalkhawmte chuan Chapchar Kut hman hun hi March ni 24, 2017-ah sawn nise, a hmanna hmun atan Leisekawt Field nise tiin an rel bawk.

Nimina Meeting hian a hmanna hmun tur Leisekawt Field ruahman dan tur leh chanvo hrang hrang changtu turte a ruat a, programme kimchang erawh chu Serchhip Sub-Hqrs. YMA kutah hlanin naupang lam (YMA Chhang) ten a tam thei ang ber chanvo an neih theih dan tur ngaihtuah chunga a hman dan tur duan nise tiin an rel a. Sub-Hqrs. MUP leh MHIP lam pawh Chapchar Kut-ah hian chanvo engemawzat nei tura beisei an ni bawk.