Sialsuk dai-a lirthei chesual ah mi 5 boral

Inrinni kalta, Sept. 6, 2014 khan Sialsuk bula truck chesualah hnamdang 2 tiamin a chuang zawng zawng mi 5 an thi a, thi zinga Mizo 3-te hi in khata cheng an ni.

Thudawn danin he Truck, As 24-C/2231 hi Lunglei-a bungraw dah rawn let leh niin Sialsuk thlenhma Km 6 velah che-sualin kawngthlang ah a tlanliam a, he Motor a chuang Zongaih-awma (46) s/o Lalengzauva leh a phirpui Lalchawikunga leh Lalnunhlimi (34) w/o Lalchawikunga, Sailam khua bakah Motor khalhtu Suhag Uddin Borbuya (25) leh Handyman Hussein Uddin Laskar (22), Dholcherra ve ve te chu a hmunah an thi vek a ni. He Motor a chuang Sailam mi 3 te hi ram riak haw lam niin chawhma dar 10:00 velah an chhungte nen an inbia a, thimhnu ah pawh In an thlen loh avangin mi tlawmngai ten zawngin Motor chesual hi an hmu a, zan dar 12:00 rik hma deuh khan ruang te hi lakchhuah kim niin an chetsualna hi a awih hle a, Motor pawh a chhe hneh hle nia thudawn a ni. Sailam khua mi 3 boral te hi nimin khan Thlan pakhat ah phum an ni.