June 14, 2014 hmaa Zirtirtu semrual turin MZP in phut.

Mizo Zirlai Pawl (MZP) Gen. Hqrs. chuan June 14,2014 ral hma ngeia zirtirtu semrual hna thawk turin Mizoram sorkar an ngen a, an ngenna in awmzia a neilo anih chuan zirtirtu nei mumallote harsatna sukiang turin a tawp thlengin hma an la dawn tih an sawi. Inrinni kalta May 24, 2014 khan Aizawl Press Club-ah chanchinbumite kawmin MZP hruaitute chuan hun rei tak sorkar enkawl zirna In-a zirtirtu indaihlohna sutkian anih theihnan hma an lo la tawh tih an sawi a, a bikin thingtlang lama zirna In ten zirtirtu an neih mumalloh chhan chu zirtirtu tlem vang ni lovin zirtirtu awmsa semrualloh vang a ni, an ti. MZP hruaitute chuan School Education Department in MZP zawhna a chhan dan ang chuan Mizoram sorkar enkawl Primary School in zirtirtu pali \heuh in nei ta se, zirtirtu 40 lai an la bang dawn tih sawiin, sorkar enkawl Middle School tinin zirtirtu pariat \heuhin insem ta se zirtirtu 199 lai an la chuang dawn tihna a ni bawk tih sawiin, heng bakah hian SSA hnuaiah bik Primary School zirtirtu 550 awm in, Middle School (UPS)-ah zirtirtu 1643 an awm a, Art Instructor 410 leh Health Instructor 404 an awm bawk a. Art Instructor leh Health Instructor-te hi UPS-a awm tura tih an ni a, mahse zirtirtu indaihlohna avangin Primary School-ah pawh dah tel tho niin zirtirtu pangngai ang veka chhawr an ni a. Special Trainer te hi chhawr zui tawhlo mahse zirtirtu awmsa te semrual an nih chuan harsatna engmah a siam dawn chuanglo an ti.

    MZP hruaitute sawi danin Middle School-ah Govt. Saikuti M/S Thingsai chuan zirtirtu 3 an nei a, Upper Sakawrdai leh Zokhawthiang M/S chuan 2 ve ve an nei a ni. MZP President Lalhmachhuana chuan khaw \henkhat a zirna In tam lutuk, zirlai tlem bawk si te chu sawikhawm a, zirtirtu pawh an indaih deuhna atan hma an la tih a sawi a. Heng zirna In te hi zirtirtu \henkhat, awmna tur (quarter) neilote chenna atan hman nise tih rawtna pawh sorkar ah an thlen tawh niin a sawi bawk. MZP in RTI hmanga zawhna an siam School Education department in a chhan dan chuan Mizoram-ah Primary School 859 awmin zirtirtu 3476 an awm a, Middle school 533-ah zirtirtu 4463, High School 199-ah zirtirtu 1666 leh Higher Secondary School 20 ah zirtirtu 438 an awm a, MZP tarlan danin Primary School ah zirtirtu nei miahlo School 2, zirtirtu pakhat chauh nei 28 leh zirtirtu 2 nei School 69 an awm a. Primary School-a zirtirtu neilo te hi Ngentiang leh Selam P/S te an ni a, Ngentiang-ah hian Lungpho Middle School zirtirtu pakhat chuan tlawmngaih chhuahin a zirtir \hin a. Selam-ah hian Special Trainer an neih \hin chu chawlhtir an nih vangin zirtirtu hi an nei ta lo a ni.