Thla thar April ni 9-a Lok Sabha inthlanpui neih ruala 28-Hrangturzo (ST) Assembly Constituency-a bye-election neih tura hming pekluhna hun khar a nih hnuah he inthlanna chuh tur hian mi pahnih in an hming an pelut.
28-Hrangturzo (ST) AC inthlanna chuh tur hian March 20, 2014 khan Indian National Congress (INC) Ticket-a chuh turin Vanlalawmpuii Chawngthu, MYPCC President chuan he bial Returning Officer leh Serchhip District Bawrhsap ni bawk Dr. Franklin Laltinkhuma IAS office chamber-ah nomination a file ta a, he biala din tum nomination file hmasa ber niin hemi hnu March 22, 2014 khan eptu party inzawm-khawm pawlte United Democratic Front (UDF) aiawhin Pu H. Lalduhawma chuan Returning Officer chuan Nomination a File ve leh bawk a, he inthlanna chuh tura hming pekluh hun tawp, Inrinni thleng khan hming pelut an awm zui takloh avangin he biala bye-election neih turah hian H. Lalduhawma (UDF) leh Vanlalawmpuii Chawngthu (INC) te pahnih hi an inmalbeih dawn ta a ni. He inthlanna chuh tura hming pelut te Nomination paper hi Vawiin (24th March, 2014) chawhma dar 11:00 hian he inthlanna a Returning Officer, Serchhip District Bawrhsap Office-ah enfiah a ni dawn a, heta Nomination paper pawm te tan hian tun thla ni 26 chawhnu dar 3:00 thlengin inhnuhdawh leh theihna hun hawn leh a ni ang.
Comments
Post a Comment